A Filmoteca da Galiza xa ten preparada a súa carteleira de febreiro, que desde esta quinta feira, día 1, e até finais de mes lle propón ao público 36 novas citas cinéfilas. Destaca, entre elas, a visita do cineasta finés Aki Kaurismäki, quen estará a cuarta feira 7 de febreiro ás 20,30 horas na sede da cinemateca para presentar a súa última longametraxe, Fallen Leaves.
A fita, que é xa o seu maior éxito, con máis de 110.000 espectadores no Estado e aínda en cartel en moitas cidades, poderá verse con subtítulos en galego como parte da retrospectiva que a Filmoteca da Galiza lle dedica até o mes de abril. Xunto co arranque deste ciclo, a nova carteleira mensual tamén porá o foco no realizador galego Lois Patiño, ademais de lle dar continuidade ao especial co que repasa algúns dos títulos esenciais de Wim Wenders.
Coa excepción de Fallen Leaves, que volverá proxectarse o día 9 ás 18 horas, os filmes de Kaurismäki seleccionados para febreiro ofrecen un percorrido cronolóxico desde os inicios da súa carreira, comezando os días 6 e 8 con Sombras no paraíso, xustamente anterior a Hamlet vai de negocios, na que desenvolve a súa versión anticapitalista do clásico de Shakespeare e que poderá verse os días 14 e 15.
Ariel proxectarase o 17 e o 20 de febreiro, mentres que o día 22 será a quenda de Leningrad Cowboys Go America, unha das longas da serie de traballos que lle dedicou a este singular grupo de rock. Completa a escolma do mes A moza da fábrica de mistos, programada os días 23 e 27 e que, xunto a SSombras no paraíso e Ariel, conforma a súa triloxía do proletariado.
Estes títulos marcan o inicio da que está considerada como unha das máis singulares traxectorias do cinema contemporáneo. As películas de Kaurismäki amosan unhas raíces fondamente ancoradas na súa Finlandia natal, con imaxes secas e enchidas de soidade e de melancolía, das que emerxe un discurso que fala do desamparo social, da derrota individual ou da desolación existencial, entre outros temas, e no que destaca tamén a súa particular ollada traxicómica.
Esta é a segunda vez que a Filmoteca da Galiza lle dedica un ciclo ao director finés, do que xa ofrecera unha retrospectiva entre finais de 1999 e primeiros de 2000. Naquel momento, Kaurismäki tiña estreadas 15 das 20 longas coas que conta ata a data, ademais de numerosas curtametraxes. Desde entón, a súa produción ten sido máis espazada, pero sempre con gran impacto entre o público e alcanzando, ademais, os seus maiores éxitos.
Catro filmes de Lois Patiño
A outra visita do mes será a do director vigués Lois Patiño, quen o día 28 presentará Samsara, a súa última longametraxe. Rodada entre Laos e Tanzania, esta reflexión sobre o ciclo da morte e a reencarnación budista está a ser un inesperado éxito nos cinemas españois para unha película das súas características, unha sorte de documental sensorial cunha parte central na que se convida aos espectadores a pechar os ollos.
Samsara foi estreada na pasada Berlinale, onde o realizador xa estivera en 2022 coa curta El sembrador de estrellas e en 2020 con Lúa vermella, a súa primeira e aclamada longametraxe de ficción. Estes tres títulos, xunto á curtametraxe Sycorax, conforman o ciclo Marea que se poderá ver na sala José Sellier na última semana de febreiro, coincidindo coa exposición arredor da obra de Patiño que se exhibe na Fundación Luís Seoane.
Os esenciais de Wim Wenders
Mentres as salas comerciais continúan a programar Perfect Days, o último de Wim Wenders, a cinemateca galega pecha o mes que vén o seu repaso por algúns dos títulos máis coñecidos do director alemán dentro da sección Esenciais. Para estas semanas están programadas sete películas realizadas durante os anos 70 e 80, entre as que se atopa algunha das súas fitas máis icónicas: O amigo americano, que poderá verse o día 1 de febreiro ás 20,30 horas, Alicia nas cidades, Ceo sobre Berlín, ¡Tan lonxe, tan perto!, O estado das cousas, Lisboa Story e Boa Vista Social Club, estes dous últimos filmes documentais, unha das liñas máis fecundas na carreira de Wenders nos últimos tempos.
Pola súa banda, a sección Desencadres deste mes dedícaselle aos cineastas experimentais norteamericanos Sharon Lockhart e James Benning con cinco dos seus títulos. Destacan entre eles os da sesión do sábado 3, organizada en colaboración coa Agrupación Astronómica Coruñesa Ío, e nos que se aborda como mirar o ceo durante un eclipse (L. Cohen, de Benning) e nun anoitecer (Eventide, de Lockhart).
