Simoneta, a esperanza galega do europeo de esquí acuático Sub-14

O esquí náutico galego de base buscará en Italia marcar a diferenza. Tras os éxitos conseguidos en xullo no Campionato de España decorrido en Gimenells, Lleida (Catalunya), será a localidade italiana de Recetto (do 21 ao 25 de agosto), na rexión do Piamonte, a que descubra o futuro deste deporte no que a Galiza busca oco. Para o presidente da Federación Galega de Esquí Náutico e presidente do Club Dummies de Ourense, Jacobo Pereira, esta disciplina merece un recoñecemento gañado con anos de títulos. Lembra a Nós Diario a viguesa Silvia Pequeño, que alcanzou varios campionatos de España entre 2015 e 2019 ademais de competir a nivel internacional no Europeo. Actualmente Antonio Pascual, do San Telmo de Tui (Baixo Miño), obtivo moi bos postos no Estatal e tamén conseguiu en 2022 participar no Europeo. Tui será este sábado a capital do wakesurf, o deporte náutico de arrastre máis antigo Na disciplina de wakeboard (semellante ao snowboard na auga) Hugo Bugarín, do Dummies, alcanzou o terceiro posto do Campionato do Mundo en 2023, ademais de lograr o Campionato de España. Os irmáns Suárez Riesco, tamén do Dummies, alcanzaron dous Campionatos de España en 2023 e participaron na mesma competición este ano, onde a representación galega conseguiu dous campionatos en categorías Sub-12 feminina e Sub-10 masculino (Blanca Rodríguez e Pedro Suárez) e un segundo posto en Sub-10 e Sub-14 femininos (María Suárez e Simoneta Suárez). Esta última será a única galega que participará no europeo Sub-14 en Recetto "e con moitas posibilidades de conseguir medalla", prognostica Pereira. A esperanza galega Para Suárez, o europeo é o obxectivo do ano, como recoñece en conversa con Nós Diario. “Estou especialmente ilusionada, é a primeira vez que unha corredora da federación galega de menos de 14 anos chega a un europeo homologando as exixentes marcas das federacións internacionais e española e creo que podo facer un bo papel”, asegura. Conta con poder entrar nas finais “e con iso estar a loitar polo top 10”. Xa ten estudado en profundidade o lugar onde decorrerá a competición: “É un dos centros de esquí artificiais máis importantes de Europa, con tres lagos paralelos e unha climatoloxía moi favorábel”, explica, “está situado perto de Milán e permite compaxinar os adestramentos con algunha visita cultural antes da competición”, agrega. Viaxará até alí o 16 de agosto para ter varias xornadas previas de adestramentos, despois de pasar por Madrid, onde se concentrará o seu club, o Dummies. A Semana Abanca volve con vela, remo, piragüismo e esquí Estes días é inevitábel falar dos Xogos Olímpicos e da ausencia de deportes como este, que conseguiu estar presente como disciplina de exhibición en Munich en 1972. Suárez ten a esperanza de poder vivir algún día ese soño olímpico. "Está recoñecido polo Comité Olimpico Internacional e despois de Munich trabállase para non ser considerado deporte de motor", afirma. Con todo, Suárez recoñece que "aínda empregando o mesmo barco todos os participantes, de lonxe parece depender o seu resultado do motor, máis que do esquiador, algo que invalida a súa posta en marcha olímpica", conclúe. O esquí náutico, un deporte que, na Galiza, confía en traballar a base A Federación Galega de Esquí Náutico creouse en 1993, a orixe e centro de adestramento foi no encoro de Castrelo de Miño, onde os primeiros anos se forxaron moi boas e moi bos deportistas que conseguiron diversas medallas. Despois do ano 2000, entrou nunha profunda crise e a súa actividade minguouse até case desaparecer a federación. A partir dese ano comezouse unha nova etapa para fomentar o deporte base, apostando por clubs que desde esa data levan a actividade federativa. Echegoyen gaña a última regata mais despídese dos que previsibelmente serán os seus últimos Xogos Os de maior actividade son o club San Telmo (Tui), Arcade (Soutomaior), Fornelos Wake Club (Fornelos de Montes) e o Club Dummies (Ourense). Este último conseguiu quedar terceiro neste último Campionato de España en Lleida (Catalunya), representando a Federación Galega, que foi bronce.