Os exdirectivos de NGB que entraron esta semana na prisión da Lama fixérono en relación a un caso, o das prexubilacións. Que é só unha das denuncias presentadas a respecto do acontecido no proceso de fusión das caixas galegas. Hainas que fan referencia ás condicións do resgate e outras a comportamentos irregulares de ex-directivos. Lembrábao estes días o secretario nacional de CIG-Banca, Clodo Montero, a respecto da serie de denuncias presentadas ante a Fiscalía Xeral do Estado, algunhas das cales lle deu traslado á Fiscalía Anticorrupción. Montero apunta neste sentido á denuncia contra o ex-director da Corporación Caixa Galicia, José Luis Méndez López.
Méndez López e o seu fillo, José Luis Méndez Pascual, conselleiro delegado, estarían supostamente involucrados en operacións de compra-venda de activos desta entidade financeira por baixo do valor de taxación fixado pola propia caixa. Pisos, garaxes e locais que venderon á muller de J. L. Méndez (posterior á separación de bens) por baixo do prezo taxado. Isto é o que denunciou o sindicato nacionalista.
Así, e sempre segundo esta denuncia, Rosa Pascual, muller do ex-director de Caixa Galicia e nai dun conselleiro delegado da Corporación CG, adquiriu en tres operacións desenvolvidas entre decembro de 2009 e novembro de 2010 catro vivendas, un local e sete garaxes en Compostela e A Coruña polas que pagou uns 1.500 mil euros. Unha cantidade case 300.000 euros por baixo do prezo de taxación que a propia Caixa Galicia estabelecera para eses inmobles, 1.800.0000 euros.
