Venezuela

Dicer a verdade é o primeiro deber de todo revolucionario. Fidel Castro O pasado 28 de xullo de 2024 celebráronse eleccións presidenciais na República Bolivariana de Venezuela (RBV). De acordo cos resultados proclamados polo Consello Nacional Electoral (CNE), o candidato Nicolás Maduro, actual presidente do país, gañou as eleccións obtendo o 51,95% do voto popular. O candidato da oposición dereitista, Edmundo González, obtivo, segundo os datos oficiais, o 43,18% en tanto que a porcentaxe restante se repartiría entre outras candidaturas menores. Foi por iso que o CNE proclamou presidente electo a Nicolás Maduro, comezando desde esa proclamación a contar o prazo de trinta días concedido ao CNE polo artigo 125 da Lei Orgánica dos Procesos Electorais para publicar oficialmente os resultados na Gaceta Electoral da RBV. É de salientar que o CNE non realizou aínda unha publicación oficial debullada dos resultados, a diferenza do que fixera en anteriores comicios. A explicación oficial é que o organismo foi obxecto dun ataque informático que mesmo non afectando á integridade dos resultados electorais impediu a comunicación das actas e a súa totalización, tal e como prevé a referida Lei Orgánica dos Procesos Electorais. O ataque foi confirmado pola empresa estadounidense de ciberseguranza Netscout, que detectou un incremento de máis dun 500% dos ataques de DDoS (denegación de servizo) dirixidos contra sitios web oficiais da RBV, entre eles o do propio CNE. O informe pódese consultar na rede. Na noite do día seguinte á elección, 29 de xullo, e aproveitando que a páxina do CNE estaba inoperativa, a opositora Plataforma Unitaria Democrática (PUD) habilitou unha web onde, segundo afirmaban, podían consultarse o 83,5% das actas de votación. A páxina, tanto pola súa denominación –resultadosconvzla.com– como polo seu deseño, é unha tentativa indisimulada de estabelecer unha institucionalidade alternativa á oficial. Porén, a veracidade dos datos que ese sitio web recolle ten sido contestada desde diversas instancias salientándose a inexistencia ou a repetición de sinaturas ou a sospeitosa coincidencia das mesmas porcentaxes (70% para Edmundo González, 30% para Maduro) na práctica totalidade das mesas, porcentaxes, aliás, que replican as ofrecidas pola sondaxes difundidas pola oposición de dereitas antes dos comicios. Ao tempo que publicaba esa páxina web, a oposición chamou a defender nas rúas a súa suposta vitoria, provocando graves incidentes que lembraron ás tristemente famosas guarimbas de 2014. Sufocadas as protestas violentas e recuperada a normalidade, o pulso entre os que apoian o presidente Maduro e os da oposición maniféstase a través de marchas nas que uns e outros tratan de mostrar a súa forza. Un guión xa escrito Dígase, de pasaxe, que o guión xa estaba escrito con antecedencia. En contra do asinado en outubro de 2023 en Bridgetown, capital das Barbados, entre representantes do goberno da Venezuela e da oposición, tanto o candidato dereitista como, en especial, a líder da PUD, María Corina Machado, evitaron en todo momento comprometérense a recoñecer os resultados oficiais proclamados polas institucións venezolanas. Confiaban, talvez, en que os Estados Unidos e a UE repetisen o que fixeran en 2019 cando recoñeceran a Juan Guaidó como presidente interino. Mais moitas cousas mudaron desde aquela na Venezuela e na América Latina. Dunha parte, a existencia de gobernos de esquerda en Colombia, México e Brasil. Da outra, a mellora da economía venezolana e a intensificación das súas vendas de gas e petróleo aos Estados Unidos. E, por último, o descrédito interno e internacional dunha oposición extremista que, igual que no pasado, segue alentando o golpismo e a violencia e a intervención exterior. Desta volta son Lula, AMLO e Petro os que están a marcar a pauta: impedir calquera inxerencia externa e esixir a publicación dos resultados oficiais dos comicios. En contra do que afirma o Departamento de Estado dos Estados Unidos, o mundo non se divide entre réximes democráticos e réximes autoritarios En contra do que afirma o Departamento de Estado dos Estados Unidos, o mundo non se divide entre réximes democráticos e réximes autoritarios. A división principal, gostemos ou non, é outra diferente. A que coloca dun lado o imperialismo estadounidense e os seus aliados e sitúa, no outro, un campo heteroxéneo de países con sistemas diversos unidos pola súa negativa a aceptar o status quo imperial. Esa é a batalla principal que se está a librar en Venezuela. Cuestión distinta é que esa batalla debe librarse coas armas da democracia e da legalidade. Porque esa foi a decisión do pobo de Venezuela e porque diso depende a lexitimidade e a continuidade do proceso bolivariano e, con el, dos demais gobernos progresistas latinoamericanos.