Despois do falecemento dun operario que caeu desde unha altura de 10 metros esta terza feira nunha nave de Santiago de Compostela, na mañá desta cuarta, á mesma hora, uns minutos antes das 9h, outro operario perdeu a vida tras caer dunha altura moi pronunciada: uns 20 metros.
Ocorreu nunha nave situada no lugar de Pazos, en Marcón, no concello de Pontevedra. O traballador, precisan desde a central de emerxencias do 112-Galiza, pertence a unha empresa de reformas e servizos e quedou tendido no chan após caer desde esa altura cando estaba traballando.
O aviso chegou ao 112 da man do persoal de Urxencias Sanitarias da Galiza-061, que tiña en marcha unha dotación para intentar salvar a vida da vítima, mais todos os esforzos resultaron "inútiles" neste caso, sinalan as mesmas fontes.
Co fin de recoller toda a información sobre o suceso e intentar esclarecer as causas deste segundo accidente laboral mortal en 24 horas no país, desde o 112-Galiza pediuse a colaboración da Policía Nacional e a Local.
