A explosión dunha planadora en Domaio, no municipio de Moaña (O Morrazo), deixou o ocupante da embarcación ferido por queimaduras. Segundo informa a central de emerxencias do 112-Galiza, a pesar de que a persoa presentaba queimaduras en ambos os antebrazos debido ao lume, non tivo que ser trasladado ao hospital.
O suceso produciuse arredor das 22 horas desta pasada cuarta feira no porto de Domaio. Varias chamadas alertaron do sucedido ao 112, que mobilizou, entre outros, o 061, Bombeiros do Morrazo, persoal de Salvamento Marítimo e axentes de Garda Civil e Policía Local, así como efectivos de Protección Civil.
Segundo a información recibida no 112-Galiza por parte dos efectivos desprazados até o punto, esta persoa resultara ferida con diversas queimaduras e o interior da embarcación quedara bastante afectada polo fogo. Tratábase dunha planadora de poliéster que comezou a arder ao tratar de arrincala.