As rendas mínimas de inserción máis baixas do Estado percíbense na Galiza

A Renda de Inclusión Social da Galiza (Risga) é unha prestación pública promovida e impulsada polo Goberno galego destinada a garantir recursos económicos de subsistencia a quen carece deles, así como a alcanzar progresivamente a súa autonomía e integración social e laboral. Na mesma dirección e cos mesmos obxectivos que a Risga, existen programas de natureza análoga no resto de autonomías, denominados, todos eles, rendas mínimas de inserción (RMI). O Informe de rendas mínimas en España que vén de publicar o Ministerio de Dereitos Sociais e Axenda 2030 para 2022, sinala que son titulares desta prestación na Galiza 6.117 homes e 3.838 mulleres. Ao tempo, apunta que da renda destes 10.000 titulares dependen outras 7.730 persoas que partillan con eles unidade familiar. Así, a Risga é o único ingreso recoñecido para 17.730 persoas residentes no país. O número de persoas beneficiarias da Renda de Inclusión Social da Galiza reduciuse nun 14,7%. Se en 2021 eran 20.313 persoas, esta cifra caeu a 17.730 persoas en 2022, confirmando a tendencia iniciada en 2020, cando as perceptoras das axudas eran 27.524. Tanto é así que nesa anualidade a Rede Europea de Loita contra a Pobreza e a Exclusión Social no Estado español (EAPN-ES), situaba o 84% deste grupo de rendas en situación de pobreza severa. A contía da renda de inserción galega sitúase á cola do Estado. Segundo os datos achegados polo Ministerio de Dereitos Sociais e Axenda 2030, os beneficiarios da Risga percibiron unha axuda mensual de 434,2 euros, colocándose 82,9 euros por baixo da media do Estado español. A este respecto, a cantidade recibida durante unha anualidade por unha persoa residente na Galiza perceptora dunha RMI é inferior en 998,8 euros á do conxunto estatal. Nin Risga, nin Ingreso Mínimo Vital, colectivos demandan á Xunta a renda básica universal As cifras ofrecidas polo Goberno español, procedentes da Intervención Xeral da Administración do Estado (IXAE) dependente do Ministerio de Facenda, colocan por primeira vez a contía da renda mínima de inserción como última do Estado, tras ser superado nesta anualidade por Madrid, quen viña ocupando ese lugar nos exercicios anteriores. Mentres en 2021, a RMI galega superaba a madrileña en 23,6 euros ao mes, en 2022 situábase 35,7 euros ao mes por baixo da madrileña. Caída do investimento O investimento destinado pola Xunta da Galiza nos seus orzamentos para facer fronte a esta prestación non deixou de caer nos últimos anos. Segundo os datos fornecidos polo Ministerio de Dereitos Sociais e Axenda 2030, só en 2022 as partidas dedicadas polo Goberno galego para atender as rendas mínimas de inserción reducíronse en 7,3 millóns de euros, até asinar unha rebaixa de 16,4%. A contía da renda galega de inserción é das menores de todo o Estado español A diminución do gasto público en rendas mínimas de inserción situouse na Galiza por riba da media do Estado español, que marcou un saldo positivo de 1,7%.Neste sentido, a maioría das comunidades autónomas reduciron o investimento nesta materia, só incrementando o gasto País Valencià, Catalunya, Canarias, Illes Balears, Nafarroa e Euskadi. O Goberno galego volveu reducir en 2024, na súa Lei de orzamentos, os fondos destinados para facer fronte a estas prestacións, argumentando que caeran as persoas solicitantes nos últimos exercicios. Gasto social A evolución negativa da Risga vai parella ao comportamento doutros indicadores sociais do Goberno galego. Así, a Autoridade Independente de Responsabilidade Fiscal (Airef), atendendo á liquidación dos orzamentos de 2023 efectuada pola Intervención Xeral da Administración do Estado (IXAE), certificou que nesa anualidade Galiza foi a comunidade do Estado que menos investiu en servizos públicos fundamentais, é dicir en sanidade, educación e servizos sociais.