Na Galiza temos un problema que explica que en cada proceso electoral haxa menos electores. Trátase do envellecemento poboacional. Cada catro anos morren máis persoas vellas que xoves chegan a cumprir a súa maioría de idade. Ademáis dos problemas cognitivos e de outra índole que minguan a capacidade de voto de moitos dos nosos maiores.
Galiza conta cada proceso electoral con menos representación nas Cortes Españolas debido á merma poboacional.
O envellecemento poboacional e a dispersión da nosa poboación están danando a nación galega. A influencia dos galegos nos partidos de ámbito estatal e cada día menor, ainda que Feijoó marchara a Madrid facer as españas para o PP.
Agás o BNG, que ten unicamente obediencia os intereses das galegas e dos galegos, perden forza dentro do PSOE, PP, Sumar, Unidas Podemos e tódolos outros partidos de ámbito español. Galiza ten unha poboación de tan só dous millóns setecentos mil habitantes; penso que para ter unha nación competitiva precisaríamos de cinco millóns de habitantes.
Se unha parte dos galegos e galegas non queremos formar parte do estado español non é tan só pola diferenciación cultural senón tamén porque aspiramos a gobernar os nosos impostos. Vimos reclamando dende hai moitos anos o concerto económico para Galiza. Estou convencido de que xestionar libremente os nosos impostos sería positivo para o país.
En Euskal Herría o concerto económico é unha realidade que foi posible pola forza que Euskadi tiña cos partidos nacionalistas e independentistas no momento de facerse a Constitución de 1978.
Lembro que en Catalunya ERC fixo unha gran campaña reclamando o concerto económico e non foi quen de acadalo.
O estado centralista español quere ter participación nos nosos impostos e é por iso que non permite aos galegos nin aos cataláns ter un concerto semellante ó de Euskadi. Teremos que traballar polo retorno dos emigrantes que o desexen para así acadar máis votantes e loitar polo concerto económico para Galiza.
