cultura

Unha historia de amizade e compañeirismo coa Ruta Xacobea de fondo é o núcleo da nova curtametraxe de Andrés Castro (A Coruña, 1976), codirixida por María Fanjul. Atopando o Camiño estréase este 26 de setembro ás oito do serán no Teatro Principal de Pontevedra.

A súa morte intempestiva con apenas 54 anos sacudiu a pintura galega. Atrás quedou unha extensa, valorada obra, que partiu a mediados dos 80 de calidades matéricas para se adentrar na mancha, na intuición, na síntese. Esta sexta feira, 27 de setembro, Cambados acolle a primeira mostra póstuma de Berta Cáccamo. Juan de Nieves exerceu de comisario.

Anxo Quintela (Vigo, 1960) é o premio Nacional de Xornalismo Cultural 2019, concedido polo Ministerio de Cultura. O xurado salienta “a súa traxectoria en múltiples campos do xornalismo cultural en lingua galega e pola súa continuada implicación no coñecemento e difusión da cultura rural”.

O Festival de Ourense (OUFF, Ourense Film Festival) consuma a súa virada cara ao formato máis clásico iniciada o pasado ano. Quince longametraxes premiadas nos principais certames do mundo competirán na sección oficial do encontro, que desenvolverá do 27 de setembro ao 5 de outubro a súa edición número 24.

De pouco parece valerlle á compañía teatral Chévere o seu indiscutíbel éxito de público e crítica. Nin o seu avultado palmarés, que inclúe o Premio Nacional de Teatro do Ministerio de Cultura en 2014. Oito anos despois de que un Goberno municipal compostelán, presidido por Conde Roa, dificultase a súa continuidade na histórica Sala Nasa, a compañía padece de novo a “arbitrariedade política”: a Concellaría de Cultura de Teo desenténdese da que foi a súa compañía residente desde 2012.

Trece funcións para escolares formarán unha das principais liñas de programación da 24ª edición do festival Galicreques, que decorrerá do 12 ao 20 de outubro en Compostela. “A cidade será un ano máis gran referente para o xénero escénico dos títeres”, afirma a asociación organizadora, Barriga Verde.

Un festival “gamberro pero rigoroso”. Así se autodefine Curtocircuíto, a mostra de cinema que, do 28 de setembro ao 6 de outubro, achega a Compostela máis de 130 filmes á marxe das correntes principais. “O noso programa comprométese coa calidade artística, as últimas tendencias cinematográficas e a interdisciplinariedade”, asegura a organización. Presentou o seu contido este 19 de setembro.

É difícil definir a idea de “frikismo cinemotográfico” coa que se presenta o Galician Freaky Film Festival. A propia organización inténtao cunha enumeración de xéneros: fantasía, ciencia ficción, terror, gore e serie B. Douscentos filmes encherán o programa da terceira edición do encontro en Vigo, do 24 ao 26 de outubro.

As máis pequenas de entre as máis pequenas tamén teñen dereito á arte. O Núbebes, que comeza esta sexta feira, 20 de setembro en Pontevedra, confírmao: “Dúas intensas fins de semanas cheíñas de propostas arredor das artes escénicas, pensadas e dirixidas á cativada da casa”. Festival de artes escénicas para bebés e familia, subtitúlase.

O que arde volverá ás súas orixes. Navia de Suarna, nos Ancares, acollerá a súa primeira proxección pública na Galiza o vindeiro 29 de setembro, domingo. Participará o director do filme, Oliver Laxe, e o equipo técnico e artístico, incluídos os intérpretes protagonistas Amador Arias e Benedicta Sánchez.

Yasha é un mago de sona e talento que percorre a Polonia de finais do século XIX. Escapista, é quen de saltar barreiras ou abrir cadeados. E así vive ademais cando está fóra da escena. Este é o argumento de O mago de Lublin, novela orixinal de 1960 obra de Isaac Bashevis Singer, o máis célebres dos autores de lingua yiddish. Agora ve a luz en galego.

A segunda edición do Ames Jazz contará con dúas das propostas máis interesantes da escena galega: o Xacobe Martínez Antelo Trío e Mónica de Nut con Virxilio da Silva á guitarra. Será no Pazo da Peregrina a sexta feira, 20 de setembro, a partir das dez e media da noite.

Mover os marcos é o título da obra gañadora da décimo segunda edición do premio Vitoriano Taibo. O seu autor é Fran Fernández Davila (Vigo, 1974).

Un artigo publicado por Álvaro Cunqueiro o 6 de xaneiro de 1974 no Faro de Vigo incluía toda unha declaración de intencións, case unha manda: “E, naturalmente, con ese fondo de tristura que é o grande luxo que soio poden permitirse os mozos, e que pra adulto usado como o que estas liñas escribe, sería como a recomendación da ialma, en vésperas da morte”. A este Cunqueiro serodio e con todo vital salvábao tamén a literatura, como se deduce da compilación No obradoiro do fabulador, á que pertence o texto citado.

“as agullas dos eólicos / cosendo o tempo // as nubes / túmulos sagrados / coroando as montañas”, escribe Rebeca Baceiredo en Vésperas. É un dos poemas de Libro de horas (Urutau, 2019) e Baceiredo, unha das 17 autoras que reúne Un xardín de medio lado, subtitulado 17 poetas da Urutau na Galiza. Que cose non o tempo, senón dúas beiras do mundo galego portugués, Galiza, Portugal e Brasil.

O período para presentar obras inéditas de poesía á oitava edición do premio Lueiro Rey de poesía remata o 30 de setembro. Convoca o Concello de Fornelos de Montes en colaboración coa Deputación de Pontevedra.

Cadoul de Craciun, un filme que trata en chave de humor negro a represión na Rumanía de Ceauscescu, gañou a décimo segunda edición do Festival Internacional de Curtas de Bueu. Dirixido por Bogdan Muresanu, fíxose coa Ánfora de Ouro -dotada con 2.000 euros- e mais cos premios a mellor guión e mellor actor para o protagonista Adrian Vancica.

Trinta e oito espectáculos dos que 17 son estreas -nove absolutas e oito na Galiza- conforman o núcleo da 28ª edición do Festival Internacional Outono de Teatro (FIOT) en Carballo. Entre o 27 de setembro e o 1 de novembro, a cidade bergantiñá será a capital escénica do país. “O máis relevante da escena galega e estatal contemporánea, ademais de propostas internacionais chegadas de Portugal e Israel”, indica a organización.

O un de decembro de 1968, no Teatro Capitol de Compostela, o poeta Manuel María presentou un monllo de cantautores militantes: Benedicto, Xavier, Guillermo Rojo, Xerardo Moscoso, Vicente Araguas e Miro Casabella. Aquel concerto antifranquista quedou para a historia como o do nacemento da Nova Canción Galega. A homenaxe anual a Manuel María Lúas de Outono conmemórao o vindeiro 25 de setembro no Teatro Rosalía de Castro da Coruña.