cultura

O novo espazo web da Academia permite consultar todo o catálogo de monografías, composto por máis de 350 títulos, e descargar gratuitamente máis da metade. Sumase así ao portal das publicacións periódicas da RAG, tamén dispoñíbel na rede e que dá acceso aos 379 números do Boletín editados desde 1906, a Cadernos de lingua e La Tribuna, a revista de estudos da Casa-Museo Emilia Pardo Bazán.

 

Unha expedición de poetas galegas cruzará o vindeiro 26 de outubro o río Miño. Trátase de Arancha Nogueira, Eduardo Estévez, Xabier Xil Xardón, Quico e Raúl Gómez Pato. Lerán a súa obra na libraría Porta XIII, de Vila Nova da Cerveira.

A compilación de ensaios Identidade e afectos patrios (Galaxia, 2017) indaga “no proceso de creación e bloqueo da identidade galega e na formación dunha narrativa de Galiza como nación cultural”. Conforma ademais o mellor ensaio galego da década segundo o xurado do Premio Mondoñedo 10 e é obra do historiador Ramón Villares (Xermade, 1951).

Existen outros nihilismos máis alá da abulia e o relativismo, a desorientación e a irresponsabilidade, o escepticismo extremo e a lei do máis forte que constrúen os usos convencionais do termo. A identificalos e propolos como vía práctica da filosofía dedica o profesor Brais Arribas (Huesca, 1980) o seu último libro, Vir a menos. Crítica da razón nihilista (Axóuxere, 2019). “Imos tentar rehabilitar na medida do posíbel a noción de nihilismo”, advirte na Introdución.

A segunda etapa do Castañazo Rock de Chantada é xa máis lonxeva que a primeira. Aquel epicentro bravú virou en dous días de festival e un cartaz co máis graúdo da escena punk, rock e hip hop da Galiza e do Estado. Desta volta, Soziedad Alkoholika encabezan unha cita cuxa primeira xornada o 1 de novembro estará centrada no rap.

“Non creo que escriba nunca aquela novela tan rara sobre transplantes de estómago [...] Non creo que faga un diario. Agora teño que traballar. Se fose rico, escribiría. Se fose de familia rica, escribiría”. E, porén, Samuel Solleiro (Tui, 1982), unha das máis brillantes voces da literatura galega actual, escribe, neste caso o poema en prosa Piscinas de whiskey, piscinas de café con leite, incluído no seu novo libro, O mundo dos vivos.

O que arde, o galardoado terceiro filme de Oliver Laxe, chega esta sexta feira, 11 de outubro, ás salas comerciais da Galiza. En concreto, a 19, nas sete cidades e mais en Carballo, Monforte de Lemos, Vilagarcía de Arousa, Viveiro, A Rúa, Verín, As Pontes, A Estrada e Caldas de Reis.

En Don Xoán (contado por si mesmo), Peter Handke volve sobre a figura do libertino e preséntao cunha nova luz, a que cadra xustamente coa súa propia literatura: confusión, lindes difusas, certo pesimismo existencial. En tradución de Luís Fernández Rodríguez, é a única obra do premio Nobel 2019 en galego.

O colectivo de intervención social, que leva anos loitando pola dinamización do medio rural como vía para a redución do número e impacto dos incendios forestais, tira do prelo da man de Catroventos Editora un volume que, a través das voces de diferentes autoras, reflexiona en feminino sobre a prevención e a extinción dos lumes.

Nova Poesía Guitírica e Os Vilares, lareira de soños homenaxearán a escritora Marica Campo e mais Sara das Reixas. Será o vindeiro 19 de outubro na Casa Habaneira de Guitiriz, dentro do programa da entrega dos premios de micropoesía Vilariñas.

O xigante multinacional das teleseries aterra na Galiza. Un thriller rural baseado na novela A desorde que deixas, de Carlos Montero, será a primeira rodaxe de Netflix no país. O actor compostelán Tamar Novas é un dos protagonistas e a empresa galega Vaca Films, a produtora.

O musicólogo ferrolán realiza nun volume editado por Edicións Embora un “completo percorrido” vital e profesional pola traxectoria da artista de Cedeira, desde os seus primeiros pasos até a actualidade.

Algunhas aínda continúan activas. É o caso de Toxos e Froles, fundada en 1914; Cántigas da Terra, en 1916; Coral De Ruada, en 1918, e Cantigas e Agarimos, en 1921, as catros sociedades corais arredor das que xira a exposición Son de Galicia, promovida polo Consello da Cultura Galega e que a partir do 10 de outubro estará no Museo do Pobo Galego de Compostela.

O primeiro dos festivais galegos dedicados aos xéneros cinematográficos de fantástico, terror e ciencia ficción centrarase en dúas ideas clásicas dese campo: a utopía e a distopía. A décimo primeira edición do Festival de Cinema Fantástico FKM decorrerá do 12 ao 20 de outubro na Coruña.

Hedonista e asollado, bailábel e entusiasta, así e o novo videoclip de Brais Morán (Ourense, 1983). Disque ao So(u)l titúlase a canción, unha viaxe á xeografía en que soul se funde coa música disco, de ecos setenteiros e forza irrefreábel.

O artista, natural de Lugo, faleceu aos 80 anos de idade "por causas naturais", segundo o alcalde de Friol. A súa obra está adscrita á Nova Xeración Expresionista e Uxío Novoneyra definiuna como "o silencio da terra"