Sergas

Persoal sanitario e non sanitario dos centros de saúde da Galiza volveron protestar contra o desmantelamento da Atención Primaria.

A Estrutura Organizativa de Xestión Integrada (EOXI)da Coruña está a piques de resolver a renovación do Acordo Marco polo que se rexe a contratación da prestación de servizos sanitarios a pacientes usuarias do Servizo Galego de Saúde a empresas externas. Tres hospitais privados da área sanitaria aspiran a un contrato que ascende a 75.723.239,33 euros.

O Tribunal Supremo acaba de dar a razón a unha sanitaria que o Sergas deixou sen praza nunha oposición ao non computarlle como mérito o tempo que estivo de baixa tras dar a luz, nun tempo no que a traballadora exercía como persoal temporal do hospital de Verín. A sentenza considera que foi discriminada por razón de sexo. 

A Asociación de celadores Galegos convoca unha nova concentración nos hospitais da Galiza para reivindicar a súa valía profesional e defender os seus postos de traballo, en contra da xestión do Sergas. 

A contratación inminente de dous pediatras para Verín permitirá reabrir a atención aos partos "nos primeiros días de febreiro". Ao anuncio do Sergas seguiron as palabras do presidente Feixoo, quen adiantou que as xestantes que queiran parir no hospital comarcal deberán asinar "un consentimento informado reforzado".

As urxencias e as listas de espera son os servizos da sanidade galega que máis denuncias rexistraron ao longo do ano pasado. A Memoria 2019 da Asociación O Defensor do Paciente denuncia, ademais, a intención do Sergas de privatizar a sanidade pública e "O esgotamento da Atención Primaria". 

Galiza pechou 2019 cun tempo medio de espera cirúrxica de 54,5 días. Unha marca, explica o Servizo Galego de Saúde, que mellora todos os rexistros históricos e sitúa o territorio galego entre os que ofrecen os indicadores máis sobresalientes do sistema estatal de saúde. Fronte ás cifras ofrecidas polo Sergas, representantes das usuarias e do colectivo médico, reclaman a publicidade dos tempos reais de todos os procesos que asiste a sanidade pública.

O último episodio de vulneración do dereito a usar o galego no ámbito sanitario volve pór enriba da mesa a necesidade dun cambio lexislativo que favoreza a garantía do seu cumprimento. A queixa tramitada na Liña do Galego xa está en mans da Valedora do Pobo, de Sanidade e de Política Lingüística.

As Urxencias do Hospital Álvaro Cunqueiro de Vigo viviron a pasada sexta feira un novo episodio de vulneración dos dereitos lingüísticos dunha familia galegofalante. Unha veciña da cidade acudiu ao servizo acompañando o seu fillo de sete anos, con 39,5 de febre e unha forte dor de barriga que lles fixo temer un ataque de apendicite. A pediatra que os atendeu, após a primeira criba, pediulles de "malas maneiras" cambiar ao castelán, e ignorou as explicacións do cativo até que a nai exerceu de tradutora. 
 

Demandan a Administración galega que implante medidas urxentes, como diminuír a cota de pacientes por profesional sanitaria ou facer máis atractivos os novos contratos de continuidade.

Enfermeiras eventuais en loita volveron saír á rúa esta segunda feira para sinalar outra das eivas que sofre o colectivo. O catálogo de dificultades que atravesan como traballadoras provisionais do Sergas converteuse nun discurso fiado da "precariedade laboral extrema" á que se ven expostas, e "que se agrava cada día máis". 

O Concello da Baña convoca unha concentración o 16 de xaneiro para demandar unha mellor cobertura do servizo. As familias teñen que desprazarse até Negreira, Santa Comba ou Compostela nos días festivos, nas fins de semana ou cando a pediatra está de vacacións.

Denúnciao a Asociación de Pacientes do complexo hospitalario compostelán, que engade que perto de 40 doentes, “con ingresos asinados”, agardaban o traslado a planta ocupando as zonas de traballo do persoal.

A falta de candidaturas á oferta de dúas prazas de pediatría no Hospital de Verín, onde xa naceron de urxencia dúas crianzas, o colapso no servizo de urxencias no Hospital Clínico de Compostela ou a convocatoria dunha manifestación na defensa da Atención Primaria o 9 de febreiro marcan o inicio de 2020.

O Tribunal Supremo analizará a utilización "abusiva" dos nomeamentos de persoal estatutario eventual por parte do Sergas e as consecuencias desa actuación, co obxecto de formar xurisprudencia.

34 facultativas e facultativos do Hospital de Verín asinaron esta segunda un manifesto, dirixido ao xerente da área sanitaria de Ourense, Verín e o Barco de Valdeorras, no que demandan “o cese do desmantelamento” do centro. As profesionais afirman que a decisión de pechar o paritorio e as urxencias pediátricas é “meramente política” e consideran “insuficiente” a proposta da Xunta de ofertar dúas prazas temporais de pediatría.

 

Un comunicado da Asociación Estatal de Psicólogos Clínicos e Residentes (ANPIR) denuncia a falta de profesionais de psicoloxía clínica nos hospitais galegos, cunha proporción de 3,47 por cada 100.000 habitantes e listas de agarda para a primeira cita que oscilan entre os 6 e os 9 meses. Ao tempo, o Colexio Profesional de Psicoloxía da Galiza destaca a necesidade de incluír ás psicólogas na Atención Primaria

O servizo de xinecoloxía do Hospital Público de Verín interpuxo un recurso de alzada contra o peche do seu paritorio. Defenden que, segundo a lexislación vixente, a competencia para pechar “un servizo que leva en carteira 25 anos” compete á consellaría de Sanidade, non á xerencia da área sanitaria de Ourense. Segundo as profesionais obviáronse os trámites administrativos e legais pertinentes, limitándoas a unha reunión e o envío “dun comunicado”.  

O Tribunal Superior de Xustiza de Galiza (TSXG) acaba de estabelecer a responsabilidade patrimonial do Sergas no falecemento dun paciente do Complexo Hospitalario Universitario da Coruña (Chuac) en febreiro de 2015.