A curtometraxe “Anacos” de Xacio Baños ven de acadar o premio ao mellor guión no Festival Cortocircuito que pechou en Compostela a súa novena edición. A cita viña de de facerse hai dúas semanas coa Biznaga de Prata, Premio Especial do Xurado na XIII edición do Festival de Málaga e a Mención Especial do Xurao no Festival Internacional das Palmas. Na mellor curta galega obtivo o premio Conversa cunha muller morta de Sonia Méndez mentres o rumano Cristi Iftime facíase co de mellor ficción internacional con 15 de xulio.
A curta do realizador galego Xacio Baños (Xove, 1983) suma o premio ao mellor guión do Cortocircuito de Santiago á Biznaga de Prata, Premio Especial do Xurado no Festival de Málaga. A obra de Baños fora xa recoñecida no Festival Internacional das Palmas coa Mención Especial do Xurado.
“Anacos” ten unha duración de 6 minutos e conta no reparto con Mabel Ribera, Fernando Morán e Xosé Barato. Trátase da cuarta curtometraxe de Baños despois de Quentefrío (2009), Relación de Acordes (2009) e Estereoscopía (2011) . A curta foi gravada no Concello de Cambre. Na sinopse da peza, o director, guionista e productor, Xacio Baños, sentenza que “a vida dunha persoa pode ser tan simple e sinxela como a súa receita de biscoito”. Responde o lema ao que ao episodio persoal deixa escrito no seu blog cando evoca que seu avó, nunha xornada de traballo no monte, lle dixera: “Arreglar a casa, comprar uns montes e estudar aos fillos. Aí vai a vida dun home”. O autor completa a lembranza coa súa impresión, que está agora na base da curta premiada: “Aterroume. Como pode un home de 75 anos resumir a súa existencia en dúas liñas?”.
