Cita coa arte contemporánea en Aberto 2023

O día 28 de novembro de 2020 presentábase na Culturgal Contemporánea, unha asociación de galerías de arte que pretende aunar esforzos para impulsar as actividades que realizan ao longo do ano e aumentar a súa visibilidade no seo da sociedade. O ano foi o da pandemia, e a edición da Culturgal viuse afogada polas restricións, o que limitou a difusión do proxecto. Mais iso non impediu que Contemporánea iniciase unha serie de actividades enfocadas a reforzar a proxección do seu traballo. E talvez unha das máis pertinentes sexa a creación de Aberto, un evento no que as galerías asociadas se coordinan para inaugurar a tempada expositiva na Galiza. Aberto 2023 terá lugar o vindeiro día 21 de setembro, unha data na que se abren ao público a maioría das novas exposicións, que poderán visitarse ese día en horarios especiais. "O que buscamos é celebrar o inicio da tempada, mais tamén consolidar esa idea de 'tempada', que o público nos coñeza mellor", explica Luísa Pita, presidenta de Contemporánea. "Por diversos motivos, á xente non lle chega información sobre o noso traballo na mesma medida en que a recibe sobre outro tipo de entidades. Mesmo traballando con artistas de altísimo nivel cústanos abrirnos un oco nos medios e creo humildemente que realizamos un labor que achega moito ao conxunto da sociedade". Desinformación e falta de hábito O último informe sobre Hábitos e prácticas culturais do Observatorio da Cultura -dependente do Consello da Cultura Galega- desvelaba que a porcentaxe de persoas que visitaron unha galería de arte no período 2021/2022 era só dun 5,6 dos entrevistados, fronte a un 19,5% que foron a algún museo e un 20,2% que acudiron a algunha exposición. E, non obstante, son as galerías as que realizan un traballo de base ao longo de todo o ano, promovendo e apoiando as traxectorias das artistas que logo ocuparán as salas deses museos e exposicións. "Existe unha gran falta de información sobre as galerías de arte, supoño que por falta de hábito", opina Pita. "É moi habitual que se acheguen persoas preguntando se poden pasar a ver, se cobramos entrada... Non saben que, efectivamente, as galerías están abertas de forma gratuíta todo o ano e que incluso moitas das persoas que traballamos nelas estamos encantadas de guiar e explicar o que se pode ver nos nosos espazos". Porén, a presidenta de Contemporánea móstrase moderadamente optimista. "As cousas van cambiando pouco a pouco. Vaise creando un perfil de persoas ás que lles gusta a arte e que asisten aos actos, visitan as exposicións, están atentas ás novidades que se dan neste ámbito... Mais se comparamos co número de visitantes que acode a museos e exposicións -que tampouco é esaxerado- aínda queda moito por facer". Pita subliña especialmente a necesidade de achegarse á infancia e á mocidade. "Creo que é unha prioridade que as crianzas e a xente moza se afagan a visitar galerías, que o vexan como algo normal. Educar a cidadanía do futuro é tamén afacela a estar en contacto con todo tipo de manifestacións culturais". Talvez as múltiplas noticias que se publican -e que son as que máis eco teñen- sobre os prezos desorbitados que alcanzan algunhas obras de arte contemporánea tamén resultan disuasorias para as persoas que non coñecen a mecánica das galerías. "Sen dúbida", responde. "Forma parte desa desinformación da que falabamos. En xeral, a xente non sabe que nunha galería de arte hai obra para todos os petos. Loxicamente, unha grande instalación ten un prezo que só poden pagar institucións, museos ou grandes coleccionistas. Mais o groso do mercado está composto por un tipo de obras que se adapta a case calquera economía. Os gravados e a obra sobre papel, por exemplo, están ao alcance de calquera. Existe unha enorme variedade na arte contemporánea que se reflicte tamén nos prezos das obras". Aberto 2023 Esa variedade será a que se poderá observar desde o vindeiro día 21 de setembro, data de saída de Aberto. En Compostela, Luísa Pita presentará en De dagas e choros un clásico do seu repertorio, o surafricano Pierre Louis Geldenhuys, que sorprenderá con dez obras en parte inéditas que falan de ecoloxía e natureza. Tamén en Santiago, a Galería Metro exporá a pintura do artista multidisciplinar Pablo Orza na mostra Meetings with remarkable trees. A Galería Trinta mostrará unha selección de fotos tomadas polo artista xa case mítico Antoni Miralda entre os anos 60 e 90. A galería Nordés, pola súa parte, aposta polos Engrenaxes e estrelas do galego residente en Singapura Rubén Ramos Balsa e a súa xa madura busca da integración de ciencia e arte. Para rematar coas exposicións de Santiago de Compostela, a Galería Dupla reúne dous nomes coñecidos da pintura en Eros e Tánatos: Yolanda Dorda e Roberto González Fernández. Na Coruña, anúnciase como unha exhibición de "delicadeza e concepto" a instalación que o artista galego de proxección internacional Rodríguez-Méndez presenta na Galería Vilaseco da Coruña. Tamén na cidade herculina, a galería Moret Art propón o Arquivo de Protocolos de Xurxo Gómez-Chao, unha mirada singular sobre a historia da arte. En Ourense, a veterana María Marimón colgará das súas paredes a fotografía de José Quintanilla. Entre raíces e ausencias é un exercicio de contemplación silenciosa que transita entre o sublime e o inquietante. E para rematar, PM8/Francisco Salas, en Vigo, invita a coñecer unha colectiva internacional que reúne obras de Martha Araújo, Gabriel Borba Filho e Rosalind Nashashibi, Remove Walls: unha reflexión sobre política, racismo e outros elementos de confusión. Un proxecto vertebrador Contemporánea é unha asociación sen ánimo de Lucro constituída por nove galerías: Dupla, Luísa Pita, Trinta, Metro e Nordés, de Santiago de Compostela; Vilaseco e Moret Art, da Coruña; Marisa Marimón de Ourense; e PM8 de Vigo. Aberto é unha das súas iniciativas que busca non só unha maior visibilidade diante do público xeral, senón tamén vertebrar a arte contemporánea na Galiza, a través de proxectos conxuntos que abranguen desde a participación en plataformas dixitais até a presenza en feiras estatais e internacionais.