O festival de Poesía do Condado constrúese desde a solidariedade e a resistencia

Resistencia cultural. O Festival de Poesía do Condado celebraba baixo ese epígrafe, o ano pasado, medio século de existencia da Sociedade Cultural e Desportiva (SCD) do Condado. Mais trátase dunha resistencia activa, que pretende erixirse en vehículo de denuncia e oposición á barbarie. Así, era inevitábel que na edición deste ano -que terá lugar este sábado 31 de agosto- o protagonismo lle correspondese á solidariedade co pobo palestino. "A filosofía coa que se organiza o festival sempre está moi relacionada co internacionalismo e, este ano, era obrigatorio falar do que está a suceder en Palestina", declara, en conversa con Nós Diario Noela Vázquez, da SCD Condado."É tan insoportábel o que está pasando que sentiamos que era necesario fixar alí a mirada". Mais o Festival de Poesía quixo que esa mirada fose tamén transgresora e que dese conta da transversalidade das batallas pola paz e a igualdade. E, así, identificaron a loita da causa palestina coa loita feminista, organizando un festival en feminino, no que todas as voces serán de mulleres poetas: Shahd Wadi, Arancha Nogueira, Inma Núñez Núñez, Diana Kurich, Iris Abril Teijeira, Afra Torrado, Lucía Cernadas, Susana Araujo, Susana Arins e Charo Lopes. "Sentimos que a loita palestina pertence ao mesmo campo que a loita contra o imperialismo, contra a violencia, contra o patriarcado... A construción da resistencia contra todos eses males que ameazan a humanidade pasa sempre pola presenza das mulleres, porque case sempre son elas as primeiras vítimas de calquera clase de violencia", explica Vázquez, que destaca a presenza da poeta palestina Shahd Wadi entre as autoras que recitarán os seus versos en Salvaterra: moi significativamente a escritora que se inspira en June Jordan para escribir un texto académico, nacín palestina, nacín negra, no que se interroga sobre "que sucede se se xuntan os dous movementos de liberación, contra a ocupación e contra o racismo, loitando alén das súas propias fronteiras?". O Festival da Poesía encherá O Condado de solidariedade con Palestina Construír a resistencia desde o pensamento "Ás veces, para nós resulta devastador estar colaborando desde tan lonxe na resistencia: de súpeto aparecen as cifras de mortes e todo semella derrubarse. Mais falando con Fayez Badawi, membro da Fronte Popular para a Liberación de Palestina (FPLP), decatámonos de que todas as patas son necesarias, por iso organizamos, dentro da Mesa das Ideas, un coloquio con Shahd Wadi, o clown activista Iván Prado, a eurodeputada Ana Miranda (BNG) e o propio Fayez Badawi. Invitando persoas que están afectadas directamente, queremos seguir indagando en como a teoría da liberación pode ser máis práctica, menos teórica". Esa vontade de construír resistencia desde o pensamento leva, igualmente, a prestar atención a outras causas: David Cacchione presentará o libro ¡No pasarán!, unha historia ilustrada da Caravana Antifascista en solidariedade co Donbass, unha iniciativa internacionalista que naceu ao día seguinte do masacre na Casa de Sindicatos de Odessa, en 2014; e o xornalista portugués Bruno Carvalho, colaborador de Nós Diario, fará o propio con A guerra a Leste. 8 meses no Donbass, no que relata a súa experiencia como reporteiro de guerra no epicentro do maior acontecemento xeopolítico despois da Guerra Fría. Ademais, presentaranse outros libros como Cantos de dor e liberdade. Voces galegas por Palestina”, que reúne 42 poemas e 12 ilustracións de artistas galegas solidarias coa causa, impulsado polas entidades Galiza por Palestina, Mar de Lumes, Jenin e Pallasos en Rebeldía, coa colaboración de BDS-Galiza e editado por Tempo Galiza. A banda deseñada estará presente a través da novela gráfica Balada do Desterro, que aborda a relación do Zeca Afonso coa Galiza, a través de textos de Teresa Moure e ilustracións de Maria João Worm, que tamén será presentado na Mesa das Ideas. Pero ademais, a participación da sociedade segue sendo imprescindíbel para que o verso que denuncia se transforme en berro que protesta, e por iso o Festival ten convocada a formación dunha cadea humana -ás 16 horas, na ponte internacional- que mostre a solidariedade con Palestina, unindo as dúas beiras do río Miño. "O certo é que este ano se multiplicaron as actividades, porque o Festival xa ten unha historia detrás que o dota dunha rede de colaboradoras e amigas que fan posíbel diversificar a oferta", afirma Vázquez. aRi[t]mar premia a Sociedade Cultural e Desportiva do Condado como Embaixada da Amizade Galego-Lusófona Activismo festivo En todo caso, non hai que esquecer que a existencia dun movemento de resistencia é tamén un motivo para celebrar, e ese aspecto de festa solidaria estará a cargo do programa musical e escénico, no que este ano destaca a volta da Banda Bassotti. A medio día comezarán as actuacións con Brassica Rapa xunto a unha nova aposta rapeira do Condado, Escola da Rata. Xa pola tarde, poderá verse danza palestina con Jafra Group, xusto antes da intervención de Pallasos en Rebeldía co seu Check Point Clown. Os Carunchos servirán de aperitivo á apertura do escenario principal, que acollerá Xabier Díaz e Adufeiras de Salitre, Loita Amada, os xa mencionados Banda Bassotti, que xa estiveron no Condado en 2006, e a emblemática banda viguesa Skárnio, acompañada nos descansos por Marqués de Vilapodre DJ Set. Non faltará o deporte: o festival estrea un Aberto de Chave, campionato popular aberto á participación e que decorrerá desde as 12.30 horas no parque da Canuda. Antes desta proba, no torreiro da festa, terá lugar o xa tradicional Aberto de Billarda e á tarde no Campo do Casal, a sexta edición do xogo aberto de Fútbol Gaélico Festival da Poesía. As crianzas tamén teñen cabida na programación da festa, coa representación de A Historia de Blancaflor do contacontos Fran Rei, na Porta da Oliva. "Entendemos a poesía como unha forza que concentra toda expresión artística, prestando especial atención ao que sucede na Galiza. E esperamos que esa forza logre estender o sentimento de solidariedade con Palestina, que está sendo vítima dun xenocidio ante a pasividade de todo o mundo", conclúe Vázquez.