“Morcego é a primeira revista dixital de videoxogos en galego”, sinalan os seus promotores na propia web, “un proxecto xornalístico que pretende informar dunha maneira veraz sobre unha das industrias culturais máis importantes dos nosos tempos”.
A publicación conta coas seccións de análise, reportaxes, opinións, Zona Retro, actualidade ou deportes. É xustamente a Zona Retro unha das máis singulares, dedicada ao repaso pola prehistoria dos actuais videoxogos: das innúmeras versións de Spider-Man ao Metal Gear Solid, “un dos xogos que cambiou a industria dos videoxogos” hai agora dúas décadas.
Avanzos de novos proxectos, convocatorias como o RetroVigo -un encontro de nostálxicos das que un día foron novas tecnoloxías do videoxogo-, ou entrevistas con xogadores profesionais ou aspirantes a selo son algúns dos materiais que se poden atopar xa en Morcego.
O xornalista Carlos Pereiro atópase detrás do proxecto e conta co apoio da Mesa pola Normalización Lingüística.
