Máis de 60 países, representando todos os continentes, estarán presentes esta cuarta feira na cidade búlgara de Plovdiv para participar no Campionato Mundial Sprint Júnior e Sub-23 de piragüismo. Neste evento de alto nivel, que decorrerá até o domingo, a Galiza contará cunha ampla representación formada por 19 deportistas.
Entre as posíbeis medallas, destaca o olímpico Pablo Crespo, quen competirá en C1 nos 1.000 metros Sub-23, a mesma que terá en París 2024. Ademais, será parella de Manuel Fontán no C2 1.000 metros. A participación deste completarase no C2 500 metros con Martín Jácome, quen tamén estará en individual 500 metros.
Claudia Couto, do E.P. Cidade de Pontevedra, tentará revalidar o título continental conseguido en Italia no C1 200 metros. Así mesmo, participará no C2 mixto 500 metros con Pedro Torrado. A súa compañeira de club, Antía Otero, competirá no C2 500 metros con María Moreno, e uniranse a Valeria Oliveira, do Poio, e Viktoria Yarchevska no C4 500.
Lara Feijoo, do Tudense, e Irene Lata, do Betanzos, serán as representantes galegas no K1 200 metros e K2 500 con Daniela García, respectivamente. Ademais Lara estará presente no K4 500 metros.
En xuvenil, Natalia Moreira, tamén do Cidade de Pontevedra, competirá no K2 500 metros xunto a Claudia Blanco. Ademais, estará no equipo de K4 500 metros con Lucía Tenreiro, do Illa de Arousa, Yaiza Novo e Claudia Blanco.
En canoa, Nerea Novo, do Pontecesures, participará no C2 500 metros con Candelaria Delgado e tamén estará na proba de substitucións de 5.000 metros. Polo lado masculino, Óscar Juan, do Náutico Firrete, competirá no K4 500 metros xunto a Víctor Izarro, Diego Muñoz e Rubén Escudero.
Lara Remigio, do Poio estará con Candela Mayoral, Antonia Segura e Jimena Belén no C4 500 metros. Nicolás Braña, tamén do Poio, no C1 e C2 500 metros xunto a Raúl Fernández do Piragüismo As Torres.
Jairo Zurita, do Piragüismo As Torres, e Martín Expósito, do Cidade de Pontevedra, competirán no C2 1.000 metros, ademais de estar no C4 500 metros con Raúl Fernández e Ulises Colastra. Por último, a parella Lucía Tenreiro e Manuel López, do Kaiak Tudense, remará no K2 mixto 500 metros.
