Final espectacular da kenyana Beatrice Chebet na final do 5.000m feminino desta segunda feira que puxo en pé o Stade de France. O pelotón chegou moi parello até a última volta, cando Chebet e a súa compatriota Faith Kipyegon pisaron o acelerador para distanciarse na recta final e acabar cruzando como primeira e segunda a meta.
Porén, Kipyegon foi descualificada por un encontrón durante a proba coa etíope Gudaf Tsegay, que non obtivo o mesmo castigo. A prata foi finalmente para a neerlandesa Sifan Hassan e o bronce, para a italiana Nadia Battocletti.
Previamente disputouse a final feminina dos 800m, unha carreira na que resultou vencedora a británica Keely Hodgkinson, acompañada no podio, por esta orde, pola etíope Tsige Duguma e a kenyana Mary Moraa.
