Como se adoita dicir, nin son todos os que están, nin están todos os que son. A cita olímpica de París contará con notábeis ausencias en diferentes deportes, comezando polas delegacións ao completo de Rusia e Belarús, excluídas por mor da invasión de Ucraína, se ben algúns dos seus atletas poderán participar sen bandeira —non será un deles o campión olímpico de 100 e 200 metros costas, o ruso Evgeny Rylov, que renunciou anoxado pola decisión do COI—.
Un criterio, con todo, que non se aplicou ao Estado de Israel, que competirá nos Xogos mentres segue a perpetuar un auténtico masacre en Gaza —si estarán, igualmente, oito representantes de Palestina—.
Especialmente tráxica é a ausencia do kenyano Kelvin Kiptum, un dos favoritos na maratón após vencer nas probas de Londres e Chicago —onde pulverizou o récord do mundo— en 2023, que faleceu o pasado febreiro aos 24 anos nun accidente de tráfico.
Seguindo co atletismo,tampouco estarán —por lesión— as actuais campioa e subcampioa de triplo salto feminino, Yulimar Rojas e Patricia Mamona, nunha proba na que, consecuentemente, a galega Ana Peleteiro aumenta as súas opcións de medalla.
E tamén haberá un baleiro nas principais probas de velocidade de mulleres, pois a xamaicana Elaine Thompson-Herah, ouro en Rio 2016 e Toquio 2020 tanto en 100 como en 200 metros lisos, tampouco viaxará por lesión.
Voltando a vista ao fútbol, tampouco estarán dúas grandes estrelas como Leo Messi ou Kylian Mbappé, quen non agochara o seu desexo de representar Francia ante a súa xente.
E especialmente significativa é tamén a renuncia do ciclista esloveno Tadej Pogačar, gañador do Tour deste ano, alegando cansazo mais afeando tamén a exclusión da súa parella, Urška Žigart, do equipo olímpico feminino.
