CIG, CCOO e UGT desenvolverán esta sexta 7 de setembro protestas conxuntas en defensa da negociación colectiva. As organizacións sindicais teñen convocadas concentracións diante das asociacións de empresarios baixo o lema "A negociación colectiva é un dereito".
As centrais sinalan nun comunicado que "na actualidade, o proceso e renovación dos convenios colectivos está practicamente paralizado por razón dunha decisión política de determinadas asociacións empresariais de sector, que aproveitan o momento para levar ao límite a vixencia e ultractividade dos convenios, provocando a caída normativa dos mesmos ou unha posición de vantaxe na negociación que retroceda nos aspectos salariais e de dereitos".
"A aposta do Partido Popular por destruír este marco mediante a reforma laboral contribúe ao empobrecemento da poboación e a un deterioro máis acusado e acelerado da economía, provocando unha caída dos dereitos laborais, unha superlativa precariedade e un descenso do consumo que condena ao peche a miles de pequenas e medianas empresas coa conseguinte multiplicación do desemprego".
Horarios e lugares das mobilizacións:
Vigo: Ás 11h. García Barbón, 104.
A Coruña: Ás 12h. Praza de Luís Seone, Torre 1.
Vilagarcía: 11.30 Arcebispo Lago, 17.
Ferrol: Ás 12h. Cantón de Molíns, 8-9.
Santiago: Ás 12h. Rúa do Vilar, 54.
Lugo: Ás 12h. Praza de Santo Domingo 6-8, 2º.
Ourense: Ás 11h. Praza das Damas.
Pontevedra: Manifestación ás 12h. dende a Praza da Ferrería.
