Non somos onde hai máis ricos mas si onde os ricos teñen máis patrimonio. A lista 'Forbes' sobre as 100 principais fortunas do Estado español recolle que en Galiza figuran 'só' 8 dese cento de grandes ricos. Agora ben, o patrimonio que suman eses oito ricos supón o 42% do total que suman esas 100 grandes fortunas.
Os 8 galegos que figuran na lista Forbes reúnen en conxunto por volta de 83.500 millóns de euros. Unha cantidade moi superior á de outros territorios. Por poñer exemplos, en Madrid hai 24 das 100 principais fortunas no Estado e representan un patrimonio de case 40.000 millóns de euros, menos da metade que o galego. Nesas 100 fortunas hai 27 que residen en Catalunya, e a fortuna que teñen é de case 32.500 millóns de euros.
A terceira autonomía con máis número de ricos nesas 100 fortunas é Valencia, con 10 e 15.300 millóns de euros. En Euskai hai 8 e suman menos de 5.000 millóns. As 5 fortunas de Balears que están nesa lista de Forbes representan 6.600 millóns de euros.
Quen son?
Amancio Ortega e a súa fortuna de 69.000 millóns de euros é a que explica que en Galiza as fortunas da lista da revista estadounidense supoñan o 42% do total. El encabeza ese ranking de fortunas do Estado español, seguido da súa filla Sandra, cuns 7.000 millóns de euros. Entre eses 8 ricos galegos están tamén nomes como o de Manuel Jove, cuns 2.260 millóns de euros o ano pasado, ou Isabel Castelo, presidenta da aseguradora Ocaso, con 800 millóns de euros. Os irmáns Bartolomé e Enrique Freire Arteta (Megasa e grupo Freire Hermanos) teñen un patrimonio semellante. En sexto lugar figura Luis Fernández Somoza, que foi presidente de Azkar (600 millóns de euros); e Manuel Añón, de Hierros Añón, está de sétimo (450 millóns)
