A OPA hostil do BBVA ao Sabadell podería pór en risco oficinas en 43 concellos galegos no caso de prosperar

O Banco Bilbao Vizcaya Argentaria (BBVA) presentou a quinta feira a segunda oferta pública de adquisición (OPA) hostil da historia da banca española, coa intención de absorber o Banco Sabadell, cuxa dirección decidira esta semana rexeitar a proposta da empresa con sede en Euskadi. Na primeira ocasión, en 1987, o daquela Banco de Bilbao, precursor do BBVA, tratou de integrar sen éxito o Banesto, que acabou nas mans do Banco Santander. A proposta replica as condicións ofrecidas na tentativa de compra amigábel, unha acción do BBVA por cada 4,83 da entidade catalá, co que as e os accionistas do Sabadell obterían 16% da compañía resultante da operación, o que implica unha prima de 8% en relación ao nivel en bolsa na maña da quinta feira de ambos os dous, unha porcentaxe que se foi reducindo deste a prima de 30% que supuña coas cotizacións de finais de abril, cando se efectuou a primeira oferta. Nas primeiras horas após transcender a decisión do BBVA de tratar de forzar a adquisición, as súas accións caeron máis de 5%, namentres as do Sabadell medraron máis de 4%. En todo caso, a diferenza da anterior oferta, a OPA hostil non recolle que o Sabadell obtería tres postos non executivos, incluída a Vicepresidencia, na dirección da entidade. BBVA xa intentou sen éxito adquirir o Sabadell en 2020. A segunda feira, o Consello de Administración do Sabadell rexeitou a oferta do BBVA posto que “a proposta infravaloriza significativamente o proxecto do Banco Sabadell e as súas perspectivas de crecemento como entidade independente”, incidindo en que a “caída significativa e a volatilidade do prezo da acción de BBVA nos últimos días xera unha incerteza adicional sobre o valor da proposta”. Desde o anuncio da oferta até ese momento perdera máis de 9%, tempo no que o dos cataláns ascendeu 8,6%. As reaccións (políticas e bolsisas) á OPA hostil de BBVA sobre Sabadell Medios próximos ao Sabadell cuestionaron naquel momento os motivos polos que o BBVA, se está nunha situación económica boa, non incluíu na oferta un pago en efectivo e non só un intercambio de accións. 24 horas antes de facerse pública a OPA hostil, o Sabadell divulgou a misiva que lle enviou Carlos Torres, presidente do BBVA, antes da decisión do Consello, na que sinalaba que non teñen “ningún espazo para mellorar” os “termos económicos” da proposta, admitindo a perda de máis de 6.000 millóns de euros de valor nas últimas xornadas. A OPA do BBVA, que ten que ser validada pola súa Xunta de Accionistas e recibir a aprobación da Comisión Nacional dos Mercados e a Competencia e da Prudential Regulation Authority do Reino Unido, onde opera o Sabadell por medio da súa filial TSB, está condicionada a que a representación de máis de 50,01% do capital do banco catalán acepte a proposta. 52% dos títulos están en mans de grandes investidores, principalmente de fondos de investimento, algúns dos que, como BlackRock, o fondo máis grande do mundo, con sede nos Estados Unidos, posúen accións do BBVA. O resto pertence a persoas investidoras minoritarias. Así e todo, a chave é a decisión de 24 accionistas que dominan case 47% do capital e de 136 con pouco máis de 10%. No caso de que a OPA teña éxito, o BBVA exixiría a venda forzosa do resto de accións e procedería cunha fusión por absorción que xeraría o segundo banco en activos do Estado español, superando CaixaBank e por detrás do Santander, e o terceiro por valor en bolsa do continente. Amais, concentraría 22% dos depósitos e dos créditos concedidos no territorio. En Catalunya, deixaría dúas entidades (BBVA-Sabadell e CaixaBank) con dous terzos do crédito. Negativa gobernamental O ministro de Economía, Comercio e Empresa, Carlos Cuerpo, reaccionou ao anuncio subliñando que “nós temos a última palabra”, trasladando o seu rexeitamento á OPA hostil “tanto na forma como no fondo”. Á vez, advertiu de “efectos lesivos potenciais” no sistema financeiro polo grao de concentración, que “podería ter impacto negativo no emprego e na prestación de servizos” e a cohesión territorial. O BBVA estimou que coa fusión aforrarían en custos 750 millóns de euros, entre outras cuestións polos despedimentos e o feche de sucursais, e Torres recoñece que a operación suporía a saída de traballadoras e traballadores. Os sindicatos alertan de que perigan máis de 300 empregos coa fusión de BBVA e Banco Sabadell Na Galiza, BBVA ten 116 sucursais en 73 municipios galegos e o Sabadell 64 en 45 concellos. En 43 destas localidades o BBVA tamén ten oficinas. O sindicato maioritario do país, a Confederación Intersindical Galega (CIG), informou de que se destruirían máis de 300 postos de traballo de prosperar a OPA. A cota de mercado en base ao díxito de oficinas da entidade resultante só alcanzaría 50% en Becerreá, e chegaría ou superaría 40% no Barco de Valdeorras, Burela, Cambre, Cedeira, A Estrada, Foz, O Grove, Marín, Muros, Ordes, Ponteceso ou As Pontes. Neste caso, tres entidades acumularían 67% dos depósitos no Estado español. O portal elEconomista.es apunta que as propias autoridades da competencia poden paralizar a fusión logo de reducirse o sector a “unha decena de entidades [privadas] desde máis de medio centenar”. A raíz da suba de tipos de xuro decidida polo Banco Central Europeo (BCE), “cuestionouse se existía un oligopolio que impedía que os bancos trasladasen o incremento do prezo do diñeiro aos depósitos”, un contexto no que pasar de catro a tres grandes entidades bancarias “deixaría o resto nunha posición vulnerábel e abocadas a ser absorbidas polos colosos do sector”. Tanto o BCE como o Banco de España acabaron por presionar os bancos españois para que o encarecemento dos cartos, amais de reflectirse en créditos e hipotecas, tamén se desprazase aos depósitos. Os bancos españois están á cola da Unión Europea (UE) neste aspecto. O conselleiro delegado da xestora de patrimonio Finizens, Giorgio Semenzato, detallou que “este fenómeno é moi beneficioso para a banca, xa que queda en forma de beneficios extra con todos os xuros que as entidades non remuneran aos seus clientes”. Os cinco principais bancos do Estado, Santander, BBVA, CaixaBank, Sabadell e Bankinter, obtiveron en 2023 máis de 26.000 millóns de euros en beneficios, 26% máis que en 2022, unha tendencia que continúa neste exercicio a pesar da lixeira suba dos pagos polos depósitos. Con todo, Finizens sostén que as remuneracións da banca española están 55% por baixo nas contas correntes e 25% nos depósitos bancarios que a media da UE. Catalunya pide á UE que interveña Natàlia Mas, conselleira de Economía e Facenda catalá, remitiu unha misiva á vicepresidenta da Comisión Europea e responsábel de Competencia, Margrethe Vestager, para demandar que analice e rexeite a absorción, remarcando que Catalunya tería o grao de concentración bancaria máis alto da UE e cuestionando o “burato xurídico” que impide combater esta situación. Mas tamén criticou os efectos que tería sobre o emprego e o poder económico do país.