O Concello de Pontevedra aprobou estasegunda feira unha modificación de crédito que permite incorporar 10,3 millóns de euros ao orzamento municipal, elevándoo por encima dos 125 millóns de euros.
A modificación aprobouse no pleno cos votos a favor do BNG e do Partido Socialista e a abstención do Partido Popular.
O concelleiro de Facenda, Raimundo González, agradeceu ao PP e ao PSOE este "ánimo construtivo" que, segundo dixo o edil nacionalista, "demostra que hai moitas cousas que nos unen en favor da veciñanza de Pontevedra".
Segundo destacou o portavoz dos populares, Rafa Domínguez, "o PP é un partido con vocación de goberno". "Esta é a primeira vez que se nos convidou a negociar", deslizou, apuntando que foi "froito da debilidade do goberno municipal", aínda que agradeceu igualmente o xesto.
A modificación de crédito inclúe desde os convenios coa comunidade de montes ás subvencións aos clubs deportivos, pasando polos Premios Feroz, o Festival Río Verbena, a adquisición de vehículos para as brigadas municipais, obras de emerxencia, proxectos de zonas verdes, ciclos culturais ou grandes festas como Feira Franca ou a obra e reforma integral da rúa Rosalía de Castro, entre outras.
Raimundo González tamén sinalou que esta modificación recolle cuestións introducidas polo PP e o PSOE.
As tres formacións políticas esperan que isto marque un "punto de inflexión" e sexa o inicio dunha liña de colaboración futura "polo ben de Pontevedra".
Pleno de consensos
A corporación debateu varias mocións políticas aprobadas por unanimidade. Entre outras, a proposta do PP relativa á declaración de Área de Rehabilitación Integral do barrio da Moureira, así como a do PSOE para que o Concello constrúa un macro edificio que acolla os servizos de bombeiros, protección civil e policía.
