A factoría viguesa do grupo automobilístico Stellantis volverá parar parte da súa produción nas quendas de tarde e de noite deste xoves debido á falta de pezas necesarias para ensamblar os seus vehículos.
Tal como informou a compañía ao cadro de persoal, o Sistema 2 da planta, que monta as furgonetas das distintas marcas do consorcio, permanecerá sen actividade na tarde e na noite desta quinta feira, prevendo que volva operar na quenda da sexta, día 28.
"Por causa de forza maior, debido a dificultades de aprovisionamento, suspéndense as quendas de tarde e noite do Sistema 2 na xornada da quinta feira 27 de xuño", informou a empresa aos seus empregados.
Este parón únese ás incontábeis veces que Stellantis Vigo estivo sen actividade nos últimos meses e anos debido á falta de pezas para o ensamblaxe dos seus vehículos.
Precisamente esta pasada segunda feira, día 24, o Sistema 1 da fábrica, que produce o Peugeot 2008, tampouco operou por escaseza de compoñentes.
