A cooperativa rural galega Clun —que fabrica e comercializa as marcas lácteas Feiraco, Clesa e Únicla— aprobou, en asemblea xeral ordinaria decorrida en Ames (comarca de Compostela), as súas contas de 2023, ano no que alcanza os seus mellores resultados: 267 millóns de euros de facturación.
Segundo informa a compañía nun comunicado, consegue o seu maior Ebitda —beneficios antes de intereses e impostos—, cun aumento do 61% respecto a 2022, até chegar a perto de oito millóns de euros. Ademais, rexistrou un resultado neto positivo en todas as empresas do grupo.
O director xeral de Clun, Juan Gallástegui, destacou que se trata das mellores contas da cooperativa desde a súa fundación. Apunta que, tras varios exercicios de crecemento, procédese á superación dos problemas que se arrastraban desde hai anos. Subliña "o modo que a cooperativa escolle para crecer: desde o respecto ao traballo que se fai no campo e nas granxas".
Ademais, Clun aumenta as súas exportacións até alcanzar 65 Estados. Informa de que, tras a boa acollida dos iogures gregos en gran formato, lanzarán até unha vintena de novos produtos.
"En Clun negámonos a iniciar ningunha guerra de ofertas que desvaloriza o esforzo das mulleres e homes do noso rural", asegura.