Os 6 minutos de "Anacos" estanlle a dar moitas alegrías ao seu director Xacio Baños. Recibe agora o premio Carabela de Plata á mellor curtametraxe no festival Internacional de Cine de Cartagena despois de ser xa con anterioridade recoñecida co premio ao mellor guión no Festival Cortocircuito de Comostela, a Biznaga de Prata, Premio Especial do Xurado en Málaga e unha Mención Especial no Xurado no Festival Internacional das Palmas.
"Anacos" conta no reparto con Mabel Ribera, Fernando Morán e Xosé Barato. Trátase da cuarta curtometraxe de Baños despois de Quentefrío (2009), Relación de Acordes (2009) e Estereoscopía (2011) . A curta foi gravada no Concello de Cambre. Na sinopse da peza, o director, guionista e productor, Xacio Baños, sentenza que “a vida dunha persoa pode ser tan simple e sinxela como a súa receita de biscoito”. Responde o lema ao episodio persoal que deixa escrito no seu blog cando evoca que seu avó, nunha xornada de traballo no monte, lle dixera: “Arreglar a casa, comprar uns montes e estudar aos fillos. Aí vai a vida dun home”. O autor completa a lembranza coa súa impresión, que está agora na base da curta premiada: “Aterroume. Como pode un home de 75 anos resumir a súa existencia en dúas liñas?”.
