A xornada en lembranza de Bóveda arranca ás 13 horas de hoxe no monólito na súa honra emprazado na Caeira, en Poio, cun acto promovido pola Fundación Alexandre Bóveda e polo Concello de Poio, onde intervirán a presidenta da Fundación Alexandre Bóveda e filla do militante nacionalista asasinado, Amalia Bóveda; o escritor e vicepresidente da entidade, David Otero; o presidente da Fundación Castelao, Miguel Anxo Seixas, e o alcalde do concello de Poio, Angel Moldes.
Os actos continuarán pola tarde en Pontevedra. Así, ás 18 horas, desenvolverase unha misa no cemiterio de San Mauro e ás 19 horas un acto diante tumba de Bóveda, onde está confirmada a presenza do presidente do Parlamento da Galiza, Miguel Santalices. Pola súa banda, o BNG organiza un acto político a partir das 20.30 horas na praza Curros Enríquez, onde intervirán a responsábel do BNG de Moraña, Lucía Silva; o alcalde de Pontevedra, Miguel Anxo Fernández Lores, e a voceira nacional da formación, Ana Pontón.
A convocatoria do Día da Galiza Mártir recala tamén hoxe en diferentes localidades galegas. A asociación Alexandre Bóveda promove un acto ás 19.30 horas no paseo da Coruña que leva o nome do dirixente nacionalista coa participación de Montse Fajardo. A asociación Os Torgueiros lembra ás 17 horas na Casa da Viúva da Gudiña (comarca de Viana) Anuncia Casado e Xosé Luís Bouzas, dirixente comunista e militante nacionalista asasinados polo franquismo. O BNG organiza ás 20 horas unha palestra en Cee (Costa da Morte) co historiador Luís Lamelas e ás 20.30 horas en Boiro (O Barbanza) homenaxea Manuel Piñeiro.
O Concello de Arzúa (comarca homónima), rende tributo ás 12 horas de hoxe, diante do busto que o lembra na praza da Galiza, a Juan Manuel Vidal, alcalde da vila fusilado en 1936. Media hora antes, o Concello da Pobra (O Barbanza) lembra todos os represaliados da localidade no conxunto escultórico da memoria histórica. Por último, o espazo da Eira da Xoana, emprazado entre A Golada (O Deza) e Palas de Rei (A Ulloa), homenaxea durante a tarde ás vítimas da represión nesas comarcas.
Galiza conmemora o Día da Galiza Mártir após una semana onde se sucederon os actos de tributo ás vítimas do franquismo. Así, a asociación Irmáns Suárez Picallo lembrou o día 11 de agosto en Sada (comarca da Coruña) os demócratas asasinados en agosto de 1936, Antonio Carballeira Muñiz, Manuel Prego Chás e Xoán Antón Suárez Picallo. Pola súa banda, o 13 de agosto Cerdedo homenaxeou Francisco Arca, Severino Bugallo e José González. Un día máis tarde, o Concello e a Deputación de Lugo lembraron as vítimas da ditadura e o BNG de Ribeira (O Barbanza) homenaxeou cunha ruada pola localidade os represaliados do municipio.
Máis actos pola memoria
Na xornada de onte, Fene e Pontevedra centraron os actos da memoria. Na primeira das localidades, o Goberno local lembrou o alcalde do período republicano e dirixente socialista, Ramón González Souto. Na segunda, a praza da Liberdade acolleu o acto Voces novas contra a impunidade, organizado pola Mocidade Galega pola Memoria.
O colectivo Nordés de Mañón (Ortegal) homenaxea ás 11.30 horas de mañá Jesús Castaño, alcalde republicano fusilado en 1937. Unha hora e media máis tarde, a Asociación para a Recuperación da Memoria Histórica de Marín rende tributo nesta localidade do Morrazo a Carmen Pesqueira 'A Capirota', executada o 18 de agosto de 1936. A segunda feira, 19 agosto, o BNG lembra ás 19 horas en Compostela o alcalde nacionalista e editor Ánxel Casal, que tamén será homenaxeado unha hora máis tarde no concello de Teo, xunto a José Areosa, nun acto impulsado pola asociación A Oliveira.