Anova completou este sábado en Vigo a súa Conferencia Política Nacional sobre as eleccións municipais de maio, reafirmándose no “apoio decidido á cidadanía organizada como motor da sociedade e, por tanto, ás candidaturas populares que xurdan polo país”. Así mesmo, malia que Anova “non rexeitará ningunha fórmula xurídica, primando así o proceso de confluencia”, a forza que lideran Xosé Manuel Beiras e Martiño Noriega “non ve acaída a creación de agrupacións de electores [que non computan para os organismos provinciais], senón a creación de partidos a nivel local para evitar a fragmentación política e nacional e poder dar a batalla nas Deputacións cunha coalición instrumental”.
Polo tanto, Anova mantén a súa presenza nas Mareas e fórmulas semellantes, se ben tamén decidiu onte que “alá onde non se dean candidaturas de unidade cidadá apostaremos por estimular a creación de frontes amplas entre o tecido social e as forzas políticas do espazo de ruptura”. Estas palabras deixan aberta a posibilidade de que as siglas AGE -xa que Esquerda Unida manifestouse nese senso- poidan presentarse nalgunha localidade, se ben a formación de Beiras sempre uniría estas listas á coalición das Mareas que propoñen para as Deputacións. Mesmo afirman que non descartan presentarse como Anova nalgún concello.
Noutra orde de cousas, a Conferencia Política serviu para "definir uns principios éticos e programáticos mínimos" e tamén para que Beiras e Noriega mantiveran unha xuntanza coa Asemblea Aberta de Coia, á que amosaron o seu apoio perante o conflito que manteñen con Abel Caballero.
