Xosé Manuel Beiras compareceu perante os medios de comunicación na segunda feira (12 de xaneiro) para debullar as iniciativas que o seu grupo parlamentar, AGE, impulsará na Cámara galega no novo período de sesións. Mais o voceiro da coligazón aproveitou a oportunidade para bater contra o presidente da Xunta, Alberto Núñez Feijóo a quen acusou de ser "incontrolábel" e "o primeiro que tensiona en todos os plenos".
Unha actitude que comparou coa de Marcial Dorado "amigo" de Feijóo que cumpre condena por narcotráfico e con quen o presidente da Xunta foi fotografado nos anos '90 nunhas imaxes que viron a luz en 2013. "Un xa está no cárrece", acrecentou Beiras, "o outro aínda non, confío en que acabe na mesma situación, que é o que lle corresponde".
O voceiro de Alternativa asegurou que o goberno do Partido Popular está "a empregar as institucións para borrar do mapa o noso país e convertelo nun mero territorio" através dunha "ideoloxía das máis reaccionarias onde os cidadáns son o inimigo" e impulsada por "un individuo que practica a venda de fume e fariña para narcotizar á cidadanía".
Porén, o histórico político asegurou confiar en que se tratar dun "goberno ao que lle queda pouco tempo".
"Matan máis xente eles do que en París eses bárbaros", sinalou Beiras
![Publicidade 201995]()
Na súa intervención Xosé Manuel Beiras criticou especialmente a política sanitaria do Partido Popular e mesmo acusou o goberno galego de matar máis xente que a jihad. "Matan máis xente eles do que en París eses bárbaros", sinalou. Unhas declaracións que caeron como unha xerra de auga fría nas ringleiras do PP e que foron retrucadas polo voceiro parlamentar popular, Pedro Puy. "Semella mentira que un profesor de economía", sinalou, faga unhas afirmacións "propias dun analfabeto absoluta".
As palabras de Beiras referíanse á loita que manteñen @s doentes de Hepatite C a prol do tratamento de nova xeración que o goberno de Madrid e da Xunta lles están a negar.
Para alén das súas duras declaracións sobre o goberno Feijóo Beiras e a vice-voceira de AGE, Yolanda Díaz, explciaron cales serán os principais asuntos que centrarán a actividade parlamentar do grupo a partir do mes de febreiro. Neste senso, sinalaron que sentarán as "bases" dun "plan de emprego" e que traballarán a prol da "protección da vivenda" e a "protección social".
Por sectores, debrizaránse nalgúns dos máis atinxidos polas políticas españolas como o naval e a automoción mais tamén presentarán iniciativas para pular polos sectores primarios.
