O BNG -que se presentará ás municipais co engadido no seu nome de “asembleas abertas”- xuntou a candidat@s nacionalistas nas sete cidades de Galiza, que segundo o voceiro nacional da formación, Xavier Vence, simboliza o “estratéxico” do papel da Galiza urbana nos comicios do 25 de maio para “deixar atrás ao PP e sentar as bases dun novo proxecto de país fuxindo de visións cantonalistas”.
Vence, -que puxo Pontevedra como exemplo e aval de goberno do Bloque nas cidades-, presentou as candidaturas como “muros de contención fronte aos recortes” e garantía da “loita sen cuartel contra a corrupción”. “As cidades terán un papel chave no obxectivo de poñer as bases para empezar a pasar a páxina negra” do PP, e as candidaturas BNG-Asembleas Abertas son a alternativa á dereita e ao centralismo”, afirmou o dirixente nacionalista. “Temos a obriga de derrotar ao PP porque nos xogamos o futuro”, engadiu.
"Somos a alternativa á dereita e o centralismo", asegura Vence
![Publicidade 201821]()
O líder do BNG tamén subliñou “as altas expectativas” coas que concorre as eleccións a formación nacionalista, á que situou como “garantía da loita sen cuartel contra a corrupción, no presente e no futuro, garantía dunha xestión limpa, honesta onde os intereses dos veciños e veciñas están por riba dos intereses das empresas que conforma a rede clientelar do PP”.
Pola súa parte, tamén falaron candidat@s. Ivan Rivas destacou a prioridade de frear o desmantelamento do sector naval de Ferrol iniciado fai trinta anos por gobernos “indolentes e crueis”. O vigués Serafín Otero declarou que Vigo precisa un concello que escoite á veciñanza “non déspotas con complexo de Napoleón”. O cabeza de lista por Lugo, Ruben Arroxo, defendeu unhas infraestruturas ferroviarias “propias do século XXI e non dun libro de historia”. A ourensá Susana García reclamou para Galiza rural “a mesma calidade de vida e de servizos” que o resto do país e criticou ao clan Baltar. Ruben Cela puxo Santiago como exemplo dos efectos “nefastos” do PP e o coruñés Xosé Manuel Carril considerou fundamental a defensa da lingua e da cultura galega “que non poden ser foráneas na súa propia terra”.
"As cidades poden ser para as persoas, só hai que votar BNG", di Lores
Pola súa parte, o alcalde de Pontevedra, Miguel Anxo Fernández Lores destacou que o BNG aposta por cidades “feitas para as persoas”: “O espazo público debe ser a continuidade da propia vivenda, con prazas e rúas de calidade que permitan aos nenos ir andando á escola, que permita florecer o comercio local e os centros das cidades”. “É posible, só hai que votar ao BNG”, salientou.
