Galiza Nova culminou a súa XIII asemblea nacional coa relección de Alberte Mera como secretario xeral e un masivo apoio -dun 94 por cento- ao informe de xestión dun conclave que tivo lugar baixo o lema de “mudémolo todo”.
As mocidades nacionalistas márcanse agora como obxectivo “achegar o nacionalismo á mocidade”. Segundo Mera, o reto é facer de Galiza Nova unha organización “máis dinámica, activista, ilusionante, capaz de achegar mocidade ao proxecto do nacionalismo e do BNG, no que cremos e ao queremos chamar a moz@s de Galiza para construír un país con futuro e traballo, onde non nos condenen á emigración”.
"Queremos unha organización máis dinámica e ilusionante" dixo Alberte Mera no seu discurso final
Na clausura tamén participou o voceiro nacional do BNG, Xavier Vence, que cualificou de “traballo ilusionante” o que teñen por diante as mocidades da súa organización, malia as dificultades que terán que enfrontar. “Nada vai ser regalado, pero todo é posíbel se hai vontade”, dixo.
Vence tamén cualificou de “crucial” o papel que debe xogar a mocidade neste tempo histórico e na defensa do dereito a decidir dos pobos, a igualdade das mulleres ou a posibilidade de vivir con traballo e dignidade na propia terra.