Un total de 13.448 estudantes galegos, arredor de 600 máis que o ano pasado, están matriculados para participar entre esta terza feira e quinta feira, de 4 a 6 de xuño, na convocatoria ordinaria da Avaliación do Bacharelato para ou Acceso á Universidade (ABAU) en Galicia. Será o quinto e último ano que se desenvolva co modelo covid, que permite unha maior optatividade ao responder as preguntas, antes da reforma impulsada polo Goberno estatal, que entrará en vigor, en principio, en 2025.
Os exames do que antes se coñecía como selectividade congregarán a estes máis de 13.400 aspirantes –arredor de 13.000 polo modo ordinario, máis outros 452 que requiren necesidades específicas de apoio educativo-- en 36 centros esparexidos nunha decena de localidades galegas. Á parte de en facultades das sete principais cidades (A Coruña, Santiago, Vigo, Ferrol, Lugo e Ourense), desenvolvéranse nos institutos de Cee (comarca da Costa da Morte), A Rúa (comarca de Valdeorras) e Viveiro (comarca da Mariña).
As sedes
A maior parte dos estudantes acudirán a realizar as probas a Vigo (2.937), Santiago (2.856) e A Coruña (2.846). Tras estas, as sedes máis concorridas serán os campus de Pontevedra (1.325), Ourense (1.126) e Lugo (1.017), seguidas das comisións periféricas dos institutos Vilar Ponte de Viveiro (219), Agra de Raíces de Cee (146) e Cosme López Rodríguez da Rúa (127), que buscan evitar longos desprazamentos até as cidades.
A proba contará en todas as localidades con aulas especiais para os alumnos con necesidades de apoio. A estas, súmase outra sede a maiores que a Comisión Interuniversitaria de Galicia (CiUG) habilita no Colexio Santiago Apóstolo de Pontevedra, en colaboración coa ONCE, para os que necesiten un apoio máis específico ou que conten con algunha discapacidade, un total de 15.
A ABAU de 2024 arrincará ás 9.00 horas da terza feira cunha presentación tras a que virá o primeiro exame, que este ano por primeira vez será o de Lingua Galega e Literatura, ás 10.00 horas. O segundo será ás 11.30, tras un receso de media hora, o de Primeira Lingua Estranxeira --xeralmente inglés, aínda que tamén se pode escoller francés, alemán, portugués ou italiano-.
Sete probas
O alumnado polo xeral fai un total de sete probas ao longo das tres xornadas que dura a selectividade. Son cinco correspondentes á parte obrigatoria que, xunto coa media de Bacharelato, permiten obter até 10 puntos; máis outras dúas de materias específicas -aínda que optar por examinarse de máis- que permiten subir nota, até 14. Os resultados, que os aspirantes coñecerán ao cabo dunha semana, a quinta feira do 13 de xuño, conformarán a súa nota de acceso coa que tentarán conseguir praza nunha universidade.
Unha das principais novidades da ABAU deste ano será a posibilidade de escoller entre examinarse de Historia de España e Historia da Filosofía, como ocorría anos atrás e deixou de facerse. Tamén se poden facer as dúas probas se unha delas se inclúe na fase das específicas, aínda que na Galiza será pouco práctico porque non ponderarán á hora de escoller a titulación para cursar na universidade.
A ABAU será a última que responderá o modelo instaurado en 2020, coa irrupción da pandemia de covid. A partir do ano que vén, a selectividade concibirase como unha proba "máis competencial" e con "diferente estruturas", tendo en conta as mudanzas fixadas na Lomloe, a nova lexislación en materia educativa.
