Carballo amplía o seu inventario de árbores contra as illas de calor e o cambio climático

O Concello de Carballo vén de plantar unha trintena de árbores en distintas rúas da localidade no marco do proxecto PIMA, unha iniciativa para a posta en marcha de medidas de loita contra o cambio climático. As árbores fan as vilas e cidades máis habitábeis. Arrefrían o contorno e mitigan o ruído ao tempo que achegan benestar. Desde o pasado mes de xullo catro rúas de Carballo (Bergantiños) locen 29 árbores novas de tres especies diferentes: bidueiro branco, cereixo xaponés e árbore da seda. Son exemplares miúdos e aínda tardaran uns anos en ofrecer sombra e garantir un paseo cómodo dunha punta á outra da vila sen perder o verde de vista, mais non deixan de contribuír a un redeseño da contorna urbana que busca para a veciñanza espazos ao aire libre máis confortábeis. "É algo no que xa vimos traballando desde hai anos. Todas as obras que se fan e que contemplan unha reforma integral das rúas inclúen a plantación de árbores", sinala a Nós Diario Juan Seoane, concelleiro de planificación urbanística de Carballo. Nas rúas Perú, Enrique Sánchez, Avilés de Taramancos e Bos Aires o Concello optou por substituír o pavimento existente en faixas destinadas ao aparcamento de vehículos por zonas de celosía dotadas con cadansúa árbore, ampliando a superficie permeábel e arborada nunha contorna até o de agora dominada polo cemento e despexada de vexetación. As árbores arrefrían o ambiente, absorben o dióxido de carbono e liberan oxíxeno Neste caso, Seoane precisa que o que se fixo foi unha intervención específica na zona do Rego da Balsa. "Decidimos aproveitar as axudas do proxecto PIMA (Plans de Impulso ao Medio Ambiente) para comezar a plantar árbores nesta zona ampla de aparcamento e contribuír á mitigación do efecto illa de calor". As vagas de calor provocan xa 150.000 mortes no mundo cada ano Esta primeira actuación continuará no inverno co desenvolvemento dun proxecto de "urbanismo táctico" que contempla a plantación de máis árbores, ademais do uso de pinturas e a colocación de grandes testos para outras especies vexetais. "É certo que cando se puxeron en marcha os primeiros proxectos de humanización de áreas urbanas non se considerou a plantación de árbores", reflexiona Seoane, unha corrente que impulsou a peonalización de espazos urbanos e que en moitos concellos supuxo a eliminación de árbores e a proliferación de pavimento. "Pero desde hai cinco anos Carballo apostou por integrar árbores en cantidade". Diversidade e saúde Quen se encarga de seleccionar as especies adecuadas para cada intervención é Carmen Alonso, asesora do Concello de Carballo en materia de parques e xardíns. Segundo explica a este xornal as árbores urbanas achegan grandes beneficios e fan as cidades más habitábeis. Nun momento no que o cambio climático se fai sentir cada vez máis, Alonso asegura que a plantación de árbores "non é a solución máis innovadora, pero resulta moi eficaz". As árbores arrefrían o ambiente, absorben o dióxido de carbono e liberan oxíxeno. Purifican o aire, amortecen o ruído e acrecentan a biodiversidade. "Está demostrado que árbores poden chegar a minimizar a temperatura até sete graos". Non todas as especies ofrecen o mesmo resultado pero todas son fundamentais para a evapotranspiración e a xestión da auga de chuvia. A forma da copa e a densidade das follas marcarán a diferenza, mais non hai árbore que non axude a facer dunha zona verde "un punto de encontro". "Cando están ben pensadas e planificadas, as zonas verdes son como refuxios e moitos días transfórmanse nun local social ao aire libre". Son sinónimo de saúde e benestar emocional. David Chipperfield critica a falta de valentía das Alcaldías en materia de tráfico: "O coche tense que sentir que é o invasor e non ao revés" En Carballo, o traballo que veñen desenvolvendo a través da plantación de árbores é o de "conectar os diferentes puntos verdes da cidade: parques, xardíns, a zona do río... até conseguir ir dunha punta á outra por camiños arborados e con sombra". Cada rúa e cada barrio goza da súa propia identidade na planificación. Alonso apostou por ampliar o catálogo de especies e conferir a cada espazo unha paisaxe singular. Incorporáronse árbores con e sen flor, de folla perenne e caduca, con e sen froito... Cereixos, ginkgos, pereiras e maciñeiras ornamentais; tamén feixoas e eugenias, que dan froito e alimento comestíbel para a fauna; carpes e lagunaria patersonia, "que achega unha nota de cor ás oito sendas arboradas que conectan Carballo co rural". "Sempre se busca o equilibrio e fomentar a biodiversidade".