A CIG denunciou a maior carga burocrática que supoñen as novas instrucións da Xunta da Galiza para o transporte escolar do curso 2024/25, polas cales son os centros educativos os que tramitarán e enviarán á Administración galega solicitudes de prazas e paradas.
Así figura nas instrucións que recibiron os centros hai escasos días e que foron elaboradas polas secretarías xerais técnicas tanto da Consellaría de Educación como a de Presidencia, que agora ten asignadas as competencias en Mobilidade.
A principal novidade é que, para o próximo curso, os cambios de itinerario ou a creación de novas prazas realízanse na aplicación web 'Transporte Escolar'. Ademais, para os servizos integrados —liñas de bus que son empregadas como transporte regular de pasaxeiras e de alumnado— os centros disporán de prazo até a segunda feira 15 de xullo para realizar este trámite.
Para a CIG, principal sindicato do ensino público galego, o novo procedemento "require que as direccións dos centros se familiaricen co sistema, realicen as solicitudes e proporcionen datos precisos como coordenadas e distancias".
A central nacionalista denuncia que isto "consome un tempo considerable" e aumenta a "carga burocrática". De feito, evidencia a "insuficiencia de persoal administrativo" nos propios colexios e institutos.
Así as cousas, a CIG aproveita para criticar que, neste novo mandato, as competencias do transporte escolar pasaran da Consellaría de Educación á de Presidencia, Xustiza e Deportes, por ser a que agora ten as competencias en Mobilidade.
A xuízo do sindicato, esta separación de competencias "contribúe a aumentar a descoordinación", "engade confusión" e "dificulta aínda máis a xestión eficiente do transporte escolar".
