É unha das bandas novas máis seguidas de Galiza. Hip hop de miras amplas, “ecléctico” tal e como eles propios se definen, “combativo”, Ezetearre publican o seu segundo disco, Pólvora e tormenta, un tratado sobre “a dignidade, a solidariedade e a humildade”.
O público do Culturgal, a feira das industrias culturais de Galiza que decorrerá a primeira fin de semana en Pontevedra, optará entre tres proxectos para outorgar o seu galardón: a Casa Museo de Rosalía de Castro, o Chanfaina Lab de San Sadurniño e a Rede Cultural da Deputación da Coruña.
Pezas de “absoluta vangarda”, “obras invisíbeis que nunca chegan a canles de exhibición populares”, performance ou cineasta da marxe. Eis os materiais que abeirará Intersección, o encontro internacional de arte audiovisual da Fundación Luís Seoane da Coruña.
Rosalía de Castro. Cantos de independencia e liberdade (1837-1863) é o libro que lle acaba de valer a María Xesús Lama o Premio Nacional de Ensaio do Ministerio de Cultura. Publicado en 2017 por Galaxia, é a primeira parte dun ambicioso proxecto biográfico sobre a poeta de Follas Novas.
Baixo o mando do gran debuxante Miguelanxo Prado, Compostela tranformarase durante catro xornadas na capital da ilustración. O terceiro Encontro Internacional de Cadernos de Viaxe Compostela Ilustrada comeza esta quinta feira, 8 de novembro, coa achega de máis de 200 artistas.
Na cara A do mítico disco Galicia canta -publicado en 1970 en Caracas e pedra fundacional da Nova Canción Galega- figuraban Miro Casabella, Xerardo Moscoso, Benedicto García, Xoán Rubia, Guillermo Rojo e Xavier González. A plana maior de Voces Ceibes. A cara B, porén, estaba dedicada a un só cantor, o galego venezolano Xulio Formoso. Nado en Vigo en 1949, morreu esta cuarta feira en Madrid.
As súas dúas novelas irromperon na literatura galega con forza de best seller. Eran narrativa policial de rostro amábel, irónica, que xogaba coa identidade galega do seu protagonista, o inspector Leo Caldas, e co seu escenario, Vigo. Traducidas a varias linguas, a segunda con versión cinematográfica, do seu autor, Domingo Villar, non volveu haber apenas noticias. Dez anos despois reaparece co seu terceiro libro.
É unha emblemática obra do chamado xénero do infotenimento: “Informaçom [rigorosa] + entretenimento [formativo]”. Nas súas páxinas habitan os máis prodixiosos seres vivos, da descomunal balea azul (30 metros de lonxitude) ao musaraño de dentes brancos pigmeo, 750 veces máis pequeno. Recordes dos Seres Vivos, por primeira vez en lingua galega, ofrece anécdotas, sorpresas e curiosidades sobre o mundo natural.
O diálogo entre poesía e banda deseñada era inédito na literatura galega. Non no exterior. “Este é o primeiro libro da tradición editorial galega que a fronta a descuberta do xénero internacionalmente coñecido como Comic Poetry”, explica Yolanda Castaño (Compostela, 1977), que asina os textos ilustrados por 40 autores en O puño e a letra (Xerais, 2018).
Marco Livorno é o título do libro de poemas co que Mario Regueira (Ferrol, 1979) vén de se facer co premio Illas Sisargas de poesía erótica, “un sorprendente percorrido por relacións eróticas diversas e plurais, nun ton épico, case elexíaco”, segundo Paco de Tano, presidente da asociación cultural Caldeirón.
2019 será para a Deputación de Pontevedra o Ano da Música. Así o anunciou o responsábel de Cultura e Lingua do ente provincial, Xosé Leal, para quen “a provincia ten unha gran potencia musical en todos os eidos, tanto no popular como no profesional ou no fomativo. Dedicaremos 2019 a poñela en valor”.
A música Mercedes Peón, a xornalista e creadora do Diario Cultural Ana Romaní ou a derradeira novela de Xabier Puente Docampo son tres das oito galardoadas polos Premios da Crítica de Galiza, que se fallaron este sábado 3 de novembro en Vigo.
O ano María Victoria Moreno rematará este 27 de novembro co simposio da Real Academia Galega sobre a obra e a vida da autora distiguida co Día das Letras. As académicas Fina Casalderrey e Marilar Aleixandre organizan dúas xornadas de debate sobre “unha figura central da literatura infantil e xuvenil”.
Tres poetas de entre os máis lidos da poesía galega actual conforman o groso da Festa da Palabra de Foz, que organiza a asociación cultural A Pomba do Arco e que decorrerá entre o 7 e o 9 de novembro.
Mercedes é a patroa do arrastreiro Macallás. As súas mareas, puntuadas de lecturas e mitoloxía mariña, conforman unha xeografía do mar das galegas, unha epopea obreira e unha loanza do mundo do traballo. E revindican a unidade da fachada atlántica. Eis A gran travesía de Chiruca Macallás (Xerais, 2018), o último libro de Xurxo Souto.
O Titiriberia, festival de Teo dedicado ao singular xénero do títere da cachiporra, achegará na súa terceira edición unha ducia de funcións. Serán entre o 4 e o 11 de novembro.
É unha das citas por excelencia do outono cultural compostelán. A mostra Cineuropa atinxe este ano a súa edición número 32 e proxectará 300 filmes. O primeiro, a cuarta feira 7 de novembro no Teatro Principal de Compostela: A noite dos 12 anos, do uruguaio Álvaro Brechner, centrada no encarceramento e torturas a Pepe Mújica durante a ditadura no país austral.
Unha historia de historias, ambientada na Vilagarcía de Arousa de comezos de século onde se cruzan mariñeiros alemáns e ingleses e unha moza que “intenta ceibarse das ataduras da Galiza daquel tempo” vén de se facer co premio San Clemente na súa 24ª edición. É O xardineiro dos ingleses (Galaxia, 2017), de Marcos Calveiro (Vigo, 1968).
María Alonso Seisdedos (1961) é a primeira gañadora do Premio Xela Arias concedido pola Asociación Galega de Profesionais da Tradución e a Interpretación. O traballo de Alonso Seis enfocouse maiormente cara ao literario e o audiovisual. Foi membro do equipo que levou adiante a versión galega de Ulises, de James Joyce.
