Comisadas en Vigo 25 toneladas de quenlla conxeladas
Inspectores do Servizo de Gardacostas de Galicia comisaron case 25 toneladas (24.803 quilos) de quenlla e 49 quilos de aletas cortadas desta mesma especie de escualo nun operativo levado a cabo nun almacén frigorífico de Vigo. Segundo explican nun comunicado, o peixe proviña de Angola e foi capturado no Atlántico Sur por un buque conxelador con bandeira angolana, que se atopaba inactivo na lista do ICCAT (Comisión Internacional para a Conservación do Atún Atlántico). En consecuencia, o barco non estaba autorizado a pescar, reter a bordo, transbordar ou desembarcar túnidos e especies afíns ou especies capturadas en asociación con elas, incluíndo a quenlla.
Atopan un cadáver nunha vivenda da rúa Aragón, no barrio vigués do Calvario
A Policía Nacional achou esta segunda feira o cadáver dun home nunha vivenda da rúa Aragón de Vigo, segundo fontes policiais consultadas por Europa Press. Por agora, descoñécense as causas do seu falecemento, á espera de que a autopsia aclare os motivos polos que o home perdería a vida. Foi un particular o que alertou á Policía. O corpo deste home foi atopado sobre un colchón nun edificio xunto a unha xiringa, polo que unha sobredose podería ser a causa da morte, segundo adiantou Faro de Vigo.