Luz Couce, xefa de Neonatoloxía do CHUS, gaña o XXIII Premio Nóvoa Santos da Asomega

A Asociación de Médicos Galegos (Asomega) acordou por unanimidade outorgar á xefa do servizo de Neonatoloxía do Hospital Clínico de Santiago (CHUS), Luz Couce, o XXIII Premio Nóvoa Santos pola súa traxectoria investigadora. A Xunta Directiva de Asomega destaca de Couce, quen é tamén directora científica do Instituto de Investigación Sanitaria de Santiago (IDIS), o seu excelente palmarés científico ao longo dos últimos 30 anos, avalado por máis de 300 publicacións, 33 proxectos competitivos como investigadora principal e sete rexistros de propiedade intelectual. Este galardón recoñece "os méritos científicos e profesionais, así como o seu compromiso coa sanidade e coa Galiza" dos candidatos que se presentaron, tal e como explica a asociación de médicos nun comunicado.