África trata de frear a mpox ante o temor do mundo a unha nova variante

A declaración por segunda vez en pouco máis de dous anos dunha emerxencia sanitaria internacional por parte da Organización Mundial da Saúde (OMS) pola expansión da mpox -anteriormente coñecido como varíola do macaco- responde a que “as estratexias de control actuais non están a funcionar e existe unha clara necesidade de máis recursos”, detallou Michael Marks, docente na Escola de Hixiene e Medicina Tropical de Londres, en declaracións recollidas a quinta feira pola axencia AP, ao que Jean Kaseya, director xeral dos Centros para o Control e a Prevención de Enfermidades de África, engadiu que en “gran medida” foi ignorado a nivel internacional o incremento de casos no continente. Xa na primeira ocasión “a mpox non recibiu a atención que merecía en África, onde se orixinou, e máis tarde provocou un gromo mundial”, incidiu Tedros Adhanom Ghebreyesus, director xeral da OMS, ao declarar a emerxencia internacional na tarde da cuarta feira, remarcando que “é hora de actuar con decisión para evitar que a historia se repita”. Síntomas A doenza, que foi detectada por primeira vez en humanos en 1970 na República Democrática do Congo, informa o organismo, é endémica dos Estados do centro e o oeste de África e está provocada por un virus, concretamente un ortopoxvirus, un xénero ao que pertence a varíola, a única enfermidade humana erradicada. En comparación, a mpox causa síntomas máis leves e é común a aparición de erupcións na pel -poden afectar á cara, ás mans, aos pés, á ingua ou á área xenital- que durarían entre dúas e catro semanas canda febre, dores de cabeza, musculares, falta de enerxía e inflamación dos ganglios linfáticos. Nos casos máis graves, rexístranse erupcións máis grandes e espalladas, asociadas con infeccións bacterianas que poden afectar ao cerebro, ao corazón ou aos pulmóns. É especialmente perigosa para crianzas acabadas de nacer, crianzas en xeral, mulleres embarazadas e persoas con inmunodeficiencia. Os datos da OMS suxiren que entre 0,1% e 10% das persoas doentes falecen, matizando que a mortalidade pode diferir dun territorio a outro por factores como o acceso á sanidade. Vías de contaxio A mpox contáxiase por medio do contacto directo cunha persoa infectada, como falar ou respirar perto dela e calquera contacto coa pel ou de carácter sexual. As doentes transmiten o virus até que todas as erupcións se cobren de cotras e se forme unha nova capa de pel debaixo, amais de curar as lesións na boca, gorxa, ollos, vaxina ou ano, entre dúas e catro semanas. Tamén se pode pasar ao feto no embarazo ou pola lactación, así como polo contacto físico cun animal infectado, como algunhas especies de macacos ou roedores terrestres. Deforestación, comercio ilegal e cambio climático alentan a alza das zoonoses A confirmación da súa transmisión por vía sexual en 2022 foi chave na declaración en xullo dese ano da emerxencia sanitaria internacional -que se prolongou até maio de 2023-, nun gromo que implicou case 100.000 persoas en 116 países, principalmente homes que mantiñan relacións homosexuais, cubrindo case toda América e Europa e boa parte de Asia e Oceanía e matando arredor de 200 persoas. Unha nova cepa máis perigosa Neste caso, Tedros relatou que a aparición dunha nova variante o pasado ano, máis perigosa, a denominada 1b, que se propaga sobre todo polo contacto sexual, constituíu unha “das principais razóns da declaración” polo risco “para todo o planeta”. O certo é que as cifras indican que se trata dun surto máis letal. No seu epicentro, a República Democrática do Congo, que acumula 96% dos casos, detectáronse este ano 15.600 casos confirmados ou sospeitosos de mpox que resultaron en 537 mortes. Case 70% das e dos pacientes son crianzas menores de 15 anos, un grupo que concentra 85% dos falecementos. A nivel continental os casos elévanse até máis de 17.500. No último mes, esta cepa foi atopada en Burundi, Kenya, Ruanda e Uganda, países limítrofes co Congo e nos que non se notificaran con anterioridade casos de mpox, e a quinta feira Suecia confirmou o primeiro caso fóra de África. Porén, o gromo actual non é responsabilidade exclusiva desta variante, pois en distintos Estados foron rexistradas cepas diferentes. Até o de agora, o surto está presente en 13 países africanos logo de aumentar os casos 160% e as mortes 19% en relación cos primeiros sete meses de 2023. Vinte e catro horas antes da decisión da OMS, os Centros para o Control e a Prevención de Enfermidades de África resolveron declarar unha emerxencia de saúde pública a nivel continental. Malia que na anterior emerxencia as vacinas e tratamentos nos Estados de máis ingresos foron clave para freala, en África apenas estiveron dispoñíbeis. Kaseya incidiu en que precisan 10 millóns de doses de vacinas, namentres na actualidade contan con 200.000. Declarada a emerxencia sanitaria en toda África pola varíola do mono A Unión Europea (UE), un dos principais obstáculos á hora de suspender as patentes das vacinas para afrontar a pandemia de Covid-19, anunciou que entregará 215.000 doses ao continente. No foco orixinal, na República Democrática do Congo, mantense no leste un fráxil alto o fogo entre os militares e os grupos armados apoiados pola veciña Ruanda nun conflito que multiplicou a preocupación pola doenza e polo número de casos reais, previsibelmente máis alto. O director de Save the Children no país, Greg Ramm, alertou de que hai 345.000 crianzas sobrevivindo en tendas de campaña ateigadas e en “condicións insalubres”, cun sistema de saúde que xa “estaba a colapsar” pola desnutrición, o sarampelo e o cólera. Rexistrados seis casos na Galiza e 264 no conxunto do Estado español O Ministerio de Sanidade español informou de que, até o 8 de agosto, foron detectados este ano 264 casos de mpox no Estado, un díxito que se eleva a 8.104 ao incluír os casos desde o inicio do gromo en 2022, a cifra máis alta no continente europeo e con Francia (4.272) e o Reino Unido (3.866) por detrás. Os datos máis altos deste exercicio corresponden a Madrid, con 118, e Catalunya, con 23, ao tempo que na Galiza foron rexistrados seis. Porén, estes seis notificáronse no último mes, como a inmensa maioría dos casos en Madrid e Catalunya. Até nove territorios tiveron casos nos últimos 30 días. Nese sentido, Sanidade convocou a terza feira da vindeira semana unha reunión da comisión de alertas, na que se integran representantes de todos os territorios, para abordar potenciais modificacións das recomendacións de vixilancia ou vacinación. Un día antes o Comité de Seguridade Sanitaria da UE tratará a emerxencia de saúde declarada pola OMS. A finais de xullo, a nova directora do Centro Europeo para a Prevención e o Control de Enfermidades, Pamela Rendi-Wagner, asegurou que o risco de que a nova variante de mpox alcanzase o bloque comunitario é “moi baixo”. Asemade, o Consello Xeral de Enfermaría español demandou aos grupos de risco que se vacinen contra a mpox, lembrando que das máis de 40.000 persoas vacinadas no Estado apenas a metade recibiu as dúas doses prescritas, polo que fixo un chamamento a completar a pauta e a vacinarse a aquelas persoas que non o fixeran.