Paula Quintas, bailarina: "En Düsseldorf, busco a incidencia no mercado internacional para poder participar en xiras"

—Como chegou a ser seleccionada? Realmente houbo dúas convocatorias. Por unha banda, eu formo parte da Federación Estatal de Compañías e Empresas de Danza (Feced) a través de Emprendo Danza, a asociación á que pertenzo. A través desta houbo unha convocatoria para participar na feira bianual Tanzmesse. Fun escollida xunto con outras nove persoas de todo o Estado para estar no posto que vai pola Feced, Dance from Spain. Eu fun a única galega seleccionada. Por outra parte, que xa non ten nada que ver comigo, sei que a Axencia Galega das Industrias Culturais (Agadic) estaba en conversas polo Plan integral da danza para ter unha representación desta feira e estar no posto de Dance from Spain. A partir destas conversas, a Agadic tamén abriu a súa propia convocatoria para as persoas que quixesen estar na delegación galega. Por exemplo, neste posto de Dance from Spain tamén van estar Nova Galega de Danza, que pertence a Emprendo Danza polo tanto á Feced, mais tamén Kirenia Danza, que non pertence á Feced, mais que puido entrar a través da convocatoria de Agadic. Alén disto, tamén é certo que ti podes asistir á feira como compañía sen necesidade de que te seleccionen, pagando a inscrición e os custos que hai. De feito, o único apoio económico que eu recibo para facer isto é o dunha subvención que pedín á Xunta da Galiza tras realizar un plan de distribución, mais é unha axuda que pode pedir calquera persoa, vaia a esta feira ou non. —En que consiste a súa participación na feira? As 10 persoas que fomos seleccionadas pola Feced participaremos nun pitching con formato de mesa redonda. Ao final, o obxectivo da federación é promover o desenvolvemento profesional da danza no Estado e no estranxeiro, polo que entendo que querían amosar os distintos perfís que presentamos. Ademais desta actividade, na feira hai moitos perfís distintos, desde managers e compañías até distribuidoras ou direccións de festivais, pasando por escolas de danza ou profesionais do xornalismo e a mercadotecnia. Por iso, tes a oportunidade de entrar en contacto con todos eles e hai que facer un estudo previo bastante importante para ir enfocada e saber exactamente con quen che interesa relacionarte. Son catro días moi intensos e non podes ir sen ter un plan organizado. —Cales son as súas expectativas? No meu plan de distribución eu quería trazar tamén unha estratexia de internacionalización. A semana seguinte a estar na Tanzmesse, estarei na Fira Tàrrega (Lleida) presentando Multiperspectivas#3, un espectáculo que se foi xestando durante anos, e todo isto son pasiños para estabelecer máis relacións nesta liña. Os meus obxectivos en Düsseldorf son a incidencia no mercado internacional para a realización de xiras e o tránsito de obra con posíbeis alianzas con estruturas similares á miña, onde tamén se inclúan proxectos pedagóxicos relacionados coa investigación en pensamento. Actualmente estou realizando unha tese de doutoramento e busco unha escena internacional. Por outra parte, tamén teño interese en entrar en contacto con outras institucións culturais, especialmente no caso daquelas que dirixen festivais en espazos non convencionais ou que teñan redes noutros países. Como digo, serán días moi intensos e non sei se conseguirei todo isto, mais ese é o plan.