Un piquete impide o acceso a Navantia Ferrol de operarios das auxiliares Gabadi e Moncina

Os traballadores das empresas auxiliares Gabadi e Moncina non puideron acceder na mañá desta segunda feira ás instalacións de Navantia Ferrol, pola presenza dun piquete que bloqueou o acceso como medida de protesta polo incumprimento de convenio. Desde os sindicatos acusan estas dúas compañías, que forman parte do mesmo grupo, de incumpriren os acordos salariais do convenio provincial do metal, que ten un anexo onde se recollen os soldos mínimos que teñen que percibir estes traballadores, e que no caso de Gabadi e Moncina, segundo os sindicatos, "están por baixo destas cantidades". Ademais, a parte empresarial estaba citada o pasado día 6 a reunirse coa comisión das auxiliares, pero non acudiu ao encontro, o que motivou que desde o ámbito sindical decidisen impedir os seus traballadores entrar no estaleiro de Ferrol.