O cinema de prestixio volve ás pantallas do FICBUEU en setembro

A décimo sétima edición do Festival Internacional de Cinema de Bueu (O Morrazo), o FICBUEU, contará na súa programación con 29 curtametraxes do mellor e máis innovador cinema de autora e autor realizadas durante o último ano en todo o mundo. Entre o 6 e o 14 de setembro, a Sección Oficial do certame amosará ao público películas de distintos xéneros (ficción, animación, documental…) chegadas de 18 países: desde Brasil, Lituania, Estados Unidos, Filipinas, Portugal ou Bélxica, a Líbano, Estonia, Andorra, Italia, Alemaña ou Canadá, pasando pola República Checa, Suíza, Reino Unido, Países Baixos, Francia e España. Estreas na Galiza e no Estado A escolma realizada polo FICBUEU 2024 supón, por outra parte, unha oportunidade única para coñecer as últimas e máis interesantes propostas cinematográficas que se están a desenvolver a nivel internacional no formato curto. Case a metade dos filmes a concurso no festival bueués (13 curtametraxes) son estreas no Estado español e outros 11 proxectaranse por vez primeira na Galiza. A maioría das películas que fan parte do programa foron nomeadas e premiadas nos últimos meses en festivais de cinema tan prestixiosos como os de Cannes, Venecia, Berlín, Róterdam, Clermont-Ferrand, Annecy, Chicago, Locarno ou o South by Southwest de Austin, en Texas, nos Estados Unidos. Xunto á categoría oficial a concurso, no FICBUEU 2024 existen outras seccións competitivas. Trátase de "Descubertas" e "GZ_00", que permitirán ver o que están a facer as novas xeracións de cineastas, tanto na Galiza como no resto do mundo. Por outro lado, "Escolas de Cinema e Centros de Ensino" achegará ao público do festival pezas creadas pola incipiente canteira cinematográfica. Entre as catro categorías, en Bueu poderán verse unha vintena de curtas. O OUFF recupera a "obra mestra non recoñecida" de Carlos Velo Reflexión sobre o cinema O FICBUEU 2024 volverá convidar o público a participar nas diferentes actividades relacionadas co cinema. Desta forma, xunto aos coloquios cos autores dalgunhas das películas seleccionadas a concurso, o sábado 7 de setembro chegarán as "Xornadas Cinematográficas", que o festival inclúe na súa programación por terceiro ano consecutivo como espazo de reflexión sobre cinema. Nesta décimo sétima edición as xornadas abordarán a relación do cinema coa política. Así, haberá unha masterclass a cargo do profesor de Filosofía Política Camil Ungureanu, á que seguirán unha conversa sobre o Holocausto e a Segunda Guerra Mundial -o acontecemento histórico e político máis representado no cinema- entre as críticas e programadoras cinematográficas Belit Lago e Daniela Urzola. Tamén se poderá asistir a unha mesa redonda online con parte do equipo do podcast La escóbula de la Brújula sobre o uso do cinema como arte e como ferramenta de propaganda. Un encontro co director Jaime Rosales (Petra, Girasoles silvestres) servirá para analizar o cinema dos últimos 25 anos a través de temas clave coma o trunfo da distopía, os efectos da tecnoloxía ou a emerxencia climática. Finalmente, a xornada rematará coa proxección da película The Conversation, realizada en 1974 por Francis Ford Coppola, protagonizada por Gene Hackman e John Cazale, e cuxa trama xira arredor das escoitas como método de espionaxe. Outra das actividades programadas será o encontro que manterán co público -o domingo 8, as 12 horas- o realizador ourensán Rodrigo Cortés, o escritor Juan Gómez-Jurado e o guionista e comunicador Arturo González-Campos, integrantes de dous dos podcasts culturais máis interesantes que se emiten no Estado español, Todopoderosos e Aquí hay dragones. Entre os tres debaterán sobre o impacto do cambio que supuxo a chegada do son ao cinema. Esa mesma tarde, os tres asinarán libros nun evento ao que se poderá acceder de balde tras retirar o correspondente convite no despacho de billetes. Os pases estarán dispoñíbeis durante a mañá do domingo 8 e até o inicio do acto. Unha clase maxistral con Beatriz Batarda Caderno para o cinema de Jonas Mekas A participación de especialistas da sétima arte e do audiovisual complétaa o encontro que o público do FICBUEU terá coa profesora Nieves Febrer. Ela é a autora do Caderno #5 do festival, dedicado a repasar a figura de Jonas Mekas, cineasta experimental, axitador cultural e pai do cinema de vangarda estadounidense. Febrer presentarao o sábado 14 de setembro. O festival tamén lle dedicará a Mekas a sección "Retrospectiva", na que se proxectarán varios dos seus filmes: Cassis, Apuntamentos sobre circo, Hare Krishna, Informe desde Millbrook, Cancións de viaxe, Cuarteto #1, Filmes imperfectos de tres imaxes, Canción de Avignon e Mozart Wien &amp; Elvis. Ese mesmo día farase entrega dos galardóns do FICBUEU 2024, entre eles o Premio Cinema Galego, outorgado á actriz viguesa María Vázquez en recoñecemento á súa traxectoria e á súa contribución ao cinema galego e estatal. Ademais, desde a segunda feira 16 de setembro, co MINIFIC, regresarán as actividades infantís, coa exhibición dunha selección das mellores curtas internacionais para todos os públicos, proxeccións para centros de ensino da zona de Bueu e un obradoiro de stop motion. Unha exposición en Pontevedra recolle a memoria dos cinemas O cinema galego móstrase reflexivo no FICBUEU Dentro das películas galegas que se poderán ver nesta edición do FICBUEU destaca O frío, de Pablo Dopazo, que despois de gañar o Festival de Cans, competirá na Sección Oficial con filmes procedentes de Francia, Reino Unido ou Canadá, entre outros. Na sección GZ_00, por outra parte, poderán verse algúns filmes que xa tiveron un importante percorrido por outros festivais. Segunda, de Anita Pico, é o retrato dunha muller do campo galego na que descubrimos os valores de quen un día dominaron a historia. Desde Couso, unha pequena aldea, a matriarca de oitenta anos viviu a súa vida coa determinación e personalidade dos emperadores romanos. Pechar caixas / Abrir Caixas, de Hugo Amoedo, conta como o escritor Xavier Queipo prepara a mudanza para regresar ao país despois de vivir máis de 30 anos en Bruxelas, mentres o propio autor do filme, que reside na capital belga, non sabe cando poderá regresar. Queimar cando morra, de Inés Pintor, é unha reflexión sobre a vida e sobre o papel que xogaron as mulleres na sociedade e sobre como cambiou ao longo do tempo. Finalmente, Kalabukú, a semente do cambio, de Andrea Bouza, rodada en Senegal, relata como catro mulleres se reúnen cada domingo co seu grupo para autoxestionar un sistema de microcréditos xunto coa colleita de arroz. Xuntas, procuran atopar un equilibrio entre o modo de vida tradicional e a independencia económica. Kalabukú -"as mulleres" en lingua diola- sementan a semente dun cambio que se está xestando.