Os traballadores do sector dos centros de chamada volveron secundar maioritariamente unha greve na que exixen a fin do bloqueo do convenio colectivo, para alén de denunciar os baixos salarios e a precariedade. Laura Pérez, da CIG, afirma que o paro foi seguido polo 85% dos operarios de Vigo e que en Coruña, onde Extel sofre un ERE que implica o despedimento de 205 empregados, foi case total: un 99%. “É unha resposta moi positiva, masiva”, manifesta en conversa con Sermos Galiza. Vigo e A Coruña concentran a inmensa maioría dos perto de 8.000 traballadores do telemarketing en Galiza.
Pérez destaca que con esta xornada de protestos volve demostrarse que os traballadores non van recuar perante a aposta da patronal por rebaixar salarios e dereitos laborais. “Tenlles que ficar claro que a asistencia mantense e mesmo increméntase”, aponta. Destaca tamén que se ben até o de agora era Galiza en solitario quen turraba dos protestos, “por fin os sindicatos estatais aceptan mobilizarse e se fai a nivel de Estado, o que dá máis forza”.
Os paros e esta greve denuncian o bloqueo do convenio colectivo e as tentativas patronais de “rebaixar salarios para deixalos no ridículo e precarizar as nosas condicións laborais”, afirma a delegada da CIG no sector. “Agardemos que coa resposta tan masiva desta quinta feira, tomen nota e acepten negociar”, engade.
