Roberto Rivas, viticultor: "Atacáronnos 900 cepas e case o 80% están mortas; teremos que arrincar todo"

—As viñas dun dos predios da adega Moraima sufriron un ataque. Como se atopan as cepas? De 980 cepas que tiñamos nese predio foron atacadas 900. Case o 80% están mortas. Estamos falando dun ataque contra un terreo de 7.000 metros cadrados e o resultado é que non hai unha solución de continuidade nas viñas. Supoño que teremos que arrincar todo, estannos asesorando técnicos, mais parece que teremos que sacar todo e volver plantar. As cepas que máis nos interesaban a nós, as máis vellas, as centenarias, non van recuperar ningunha. E das novas, das que tiñan catro anos, ao ser o mes de agosto, segundo nos indican os técnicos, poderían rebrotar ao mellor sobre un 5%. É a peor época para que se recuperen as cepas. Temos cuantificadas as perdas que se poden medir, que serán de 20.000 euros nesta colleita, máis outras catro colleitas que van tardar en volver producir, e 10.000 euros da replantación, polo que estimamos que o impacto supera os 150.000 euros cumpridamente. E despois está o valor incalculábel das cepas vellas, que eran patrimonio xa, e iso non se pode medir. Foi un golpe moi duro á adega, porque era un predio no que levabamos catro anos traballando con moitas esperanzas, xa que ía ser o noso salto tanto cuantitativo como cualitativo. —Foron os impulsores da variedade 'ratiño galega', que vén de incorporarse á Denominación de Orixe Protexida Rías Baixas? Que importancia ten? É unha variedade máis de branco, unha na que nós temos moitas esperanzas porque é nosa. Tamén os técnicos e as técnicas especialistas apostan de maneira forte por ela por ser unha variedade de moita calidade e que abre o abano dos brancos. 'Ratiño galega', a nova variedade de uva branca admitida na DO Rías Baixas Para xogar no taboleiro internacional é moi importante, porque estamos falando dunha variedade que é única no mundo. Como todos sabemos, as variedades non son de ninguén, son do mundo, mais se somos os primeiros en traballar con ela, partimos con moita vantaxe. Até a vendima do ano pasado fixemos unha produción experimental, e este ano imos realizar a primeira vendima co obxectivo de facer o primeiro Rías Baixas con 'ratiño galega', vai ser o primeiro ano que se comercialice. O que si fixemos con esa produción experimental foi sacala moito a pasear, dála a catar e a coñecer, e realmente gustou e sorprendeu. O ano que vén haberá pouca cantidade, estamos traballando todo con cepas vellas e aínda non fixemos ningunha plantación de 'ratiño'. Agora si que a imos facer, mais actualmente as cepas son as que hai e non teremos unha produción de máis de 500 litros. —Por outra parte, hai unha gran preocupación na Ribeira Sacra ante a posibilidade de que as grandes adegas opten por non recoller a uva. A situación é moi fastidiada para os viticultores que teñen a súa uva colgada e o seu traballo dun ano pendente dun fío. Hai un problema de stocks na Ribeira Sacra, mais eu penso que a solución non é deixar a uva colgada. A Ribeira Sacra, en perigo A solución é facer moitísima promoción dos viños da Ribeira Sacra e que a Administración, como fixo noutros momentos de outras crises históricas noutras denominacións de orixe, poña toda a carne no asador para que esa uva non quede colgada. E iso como se fai? Pois axudando esas adegas e promovendo eses viños. A non recollida provocaría unha situación moi complicada para toda a zona, especialmente para os viticultores, moitos con explotacións de pequeno tamaño nas zonas onde é máis difícil traballar. Mais tamén sería un problema para os propios predios, para o territorio, gústanos falar da paisaxe da Ribeira Sacra, mais iso non se mantén sen os viticultores. Boas perspectivas ante a nova vendima A pesar das complicacións do último ano, a época de vendima, explica Roberto Rivas, presidente da Asociación Galega de Viticultores, chega con boas perspectivas polo bo tempo do mes de agosto e a calor. "Parece que non vai haber demasiados sobresaltos, e non estamos vendo movementos estraños noutras zonas que non sexan a Ribeira Sacra", explica o viticultor. "Hai que transmitir tranquilidade e sobre todo pedir que quen poida facer algo pola Ribeira Sacra que o faga", engade. "Toda esta zona, os canóns, os socalcos, son patrimonio de todos, e todos podemos facer algo", afirma. "Alén do esforzo que hai que requirir ás Administracións, o que podemos facer os consumidores é que, se saímos tomar un viño tinto, pidamos un da Ribeira Sacra, porque toca axudar", di Rivas. "Sen viticultores non existe a paisaxe da Ribeira Sacra", conclúe o viticultor.