A aventura de viaxar desde Verín até o Xapón empregando só unha bicicleta

Estes días, coa Volta a España a piques de visitar Galiza, a bicicleta é a protagonista do mes de agosto e a maior parte dos medios de comunicación poñen o seu foco nela. Fuxindo do reto de chegar primeiro á meta, mais co espírito entre deportivo e viaxeiro, un mozo verinés, Francisco Barreiros, 'Paquinho', decidiu dar a volta ao mundo enriba dun vehículo de dúas rodas. Partiu o 13 de marzo deste ano de Verín con destino, inicial, cara ao Xapón para despois decidir se dá o salto a América. O retorno ao seu municipio natal está previsto para setembro de 2025. Dispón dunha conta propia en YouTube, na que colabora a nivel musical a banda de gaitas Nova Era, da que é gaiteiro, e un blogue onde explica a súa experiencia e o paso polos diferentes países, mostrando as características das diferentes culturas que visita e as persoas que vai coñecendo pola ruta. A bicicleta de Francisco Barreiros. (Foto: Nós Diario) Nós Diario contactou con el esta terza feira mentres atravesaba a rexión autónoma uigur de Xinjiang (a China), concretamente Takashiken, e esta cuarta feira mesmo entrará en Mongolia. A súa motivación para levar a cabo esta aventura deportiva xurdiu de probar “se era capaz de seguir un ritmo de vida tan duro, sen case durmir en hoteis”. Alén do contacto directo coa natureza e a xente que vive nela -tenta non atravesar grandes cidades- recoñece que durante estes meses descubriu que a paisaxe “ten a súa cara B, con diferentes climas segundo avanzas no camiño”. Para Barreiros, “sei que podo cos quilómetros en bicicleta, o reto está en todo o demais, nunha maneira de vivir nómade tantos días”. Sempre a bicicleta Escoller a bicicleta para realizar esta viaxe non foi casualidade. As dúas rodas sempre acompañaron Barreiros desde pequeno e agora, con 35 anos, forman parte da súa vida. “Se teño que ir desde a miña casa até a cidade de Ourense por calquera motivo ou quedo coas amizades para ir a algún festival, por lonxe que estea, sempre a emprego como medio de transporte”, asegura. As bicicletas si son para Galiza: usuarias pulan por recuperar a súa presenza no país Mesmo para trasladarse ás actuacións da súa banda de gaitas, emprega este vehículo. Este verinés entende que, alén da práctica deportiva como tal, a bicicleta “debería utilizarse a diario e non como agora, que se acostuma a ver ciclistas só as fins de semana”. Pon como exemplo a situación de Dinamarca, Países Baixos ou Alemaña, onde o seu uso está máis estendido. Máis de 12.000 km Desde marzo realizou máis de 12.000 km atravesando países como Francia, Italia, Eslovenia, Croacia, Bosnia, Albania, Grecia, Turquía, Irán, Xeorxia, Armenia, Turcomenistán, Usbekistán e Kazajistán. Entre as facilidades que atopou na súa viaxe figura un pasaporte especial que o permite eludir a solicitude de visados (agás en Irán, Turcomenistán e no Xapón) e a validez do euro como moeda para moverse. Entre as dificultades, salienta a Nós Diario “os permisos para entrar ao interior de Turcomenistán que precisan para acceder que contrates un guía turístico”. Ademais tivo problemas coa bicicleta en varias ocasións, “algo co que xa contaba”, admite. Porén, o maior atranco nesta aventura tivo lugar antes de iniciala. O raid de aventura volve atoparse no mapa “Levoume moito tempo convencer a familia de que quería dar a volta ao mundo en bicicleta, non entendían que deixara o traballo e empregara os aforros na viaxe”, conta, “pasaron meses para que o aceptaran mais tiven a sorte de que meu pai rematou por entendelo ao coñecer máis xente que tamén querían as dúas rodas”, agrega. Até agora, o treito máis complicado de todo o percorrido desde que deixou a vila de Verín foi o de chegar a Usbequistán desde Turquía. O primeiro paso deuno na cidade turca de Urzurum, onde conseguiu unha visa de turista na embaixada iraniana, mais despois dese país tiña tres opcións para seguir a ruta: Turcomenistán, Paquistán e Afganistán. “Ningunha das tres opcións era boa polos problemas de acceso e a situación deses países, mais optei pola primeira por coincidirme no tempo co incidente que provocou a morte de varios turistas no atentado que aconteceu na rexión”, reata. Pedalear contra o vento Para conseguir pasar a Turcomenistán tivo que conseguir o permiso de tránsito en Armenia, obrigándoo a entrar por Xeorxia. “Tiven tan mala sorte que un mes antes deixaron de dar esas visas polo que obrigáronme a contratar un guía como única maneira de atravesar o país e poder chegar a Usbequistán”, conclúe o verinés. A última decisión Se a primeira idea foi dar a volta ao mundo en bicicleta, Barreiros apunta que tomará a decisión de pasar a América cando estea no Xapón e teña a posibilidade de desprazarse até Australia. “Busco que o transporte sexa sempre en bicicleta, polo que fuxo de barcos e trens e non sei se paga a pena completar a volta atravesando o Pacífico só polo feito de dicir que fixen toda a volta”, recoñece. Caso de decidir non desprazarse por mar, o seu retorno á Galiza será tamén por Asia, procurando unha ruta diferente á que empregou estes meses e visitando novos países no seu percorrido.