Muhammad Abu Salmiya, director do hospital al Shifa de Gaza, arrasado polos soldados israelís no marco da agresión militar contra o enclave palestino, foi liberado a segunda feira tras sete meses detido sen cargos ao chegar ao límite as prisións sionistas polas detencións masivas e indiscriminadas de
persoas palestinas.
O médico debullou que os sionistas causan ás persoas presas “humillacións físicas e psicolóxicas diarias” e “torturas case a diario”, amais de facer énfase en que “varios reclusos morreron nos centros de interrogatorio e foron privados de alimentos e medicinas”, ao tempo que outros sufriron amputacións das súas extremidades pola deficiente atención médica. Tamén relatou como todas as persoas coas que estivo detido perderon como pouco 30 quilos pola falta de alimentos. O al Shifa é un do centenar de centros médicos atacados por Israel na Faixa.
O ministro de Seguridade Nacional do Goberno de ultradereita israelí, Itamar Ben Gvir, cuestionou que se entregue comida ás persoas palestinas presas, defendendo que “deben ser asasinadas dun tiro na cabeza”.
