Milleiros de persoas acudiron a cuarta feira en París, a capital francesa, a unha mobilización contra a ultradereita convocada por un centenar de medios de comunicación independentes, sindicatos e asociacións.
A protesta mantén a presión na rúa contra a Reagrupación Nacional (RN), a forza de extrema dereita de Marine Le Pen que segundo as enquisas conta con posibilidades de facerse o domingo coa maioría absoluta na segunda volta das eleccións á Asemblea Nacional e contra a que xa se organizaron múltiples e masivas manifestacións desde a súa vitoria nos comicios ao Parlamento Europeo deste mes.
Segundo a lista final difundida polo Ministerio de Interior 224 candidaturas retiráronse da segunda volta, delas 134 da esquerda e 82 de Xuntos pola República e aliados, a coalición do presidente Emmanuel Macron, co fin de dificultar a vitoria nesas circunscricións de candidaturas da RN.
Ante a hipótese de que a extrema dereita non chegue ao poder, Macron descartou que existan opcións para un Goberno de Xuntos coa Francia Insubmisa (LFI), integrada na Nova Fronte Popular (NFP).