A Plataforma en defensa da pesca e dos ecosistemas mariños denunciaba na cuarta feira que unha embarcación de bandeira británica, Ivero, “que se encarga de facer un traballo para algúns dos promotores da eólica mariña na NOR-2 está pedindo que abandonen a súa zona de pesca para facer unha prospección do fondo mariño”.
O buque, que segundo puido saber Nós Diario, leva traballando desde hai algúns días na zona litoral entre Cedeira e Ferrol, conectou con varias embarcacións que se dedican á pesca na zona coa arte da volanta co obxectivo de que cesasen na súa actividade para poder desenvolver sen interferencias os traballos de prospección encargados por empresas promotoras da eólica mariña.
Os propietarios dos pesqueiros contactados por este medio descoñecen se o buque Ivero conta cos permisos necesarios para realizar os seus traballos. Porén, indican que “ningún de nós recibiu unha comunicación das autoridades marítimas indicándonos que tiñamos deixar de faenar, como acontece, por exemplo, cando se desenvolven manobras militares ou pode haber algún tipo de interferencia para a pesca”. Ao tempo, recoñecen que “é a primeira nova sobre a presenza dun barco contratado polas eólicas nesta costa”.
A zona designada como NOR-2 no Plan de Ordenación dos Espazos Marítimos (POEM) suma 1.086 km2 e é a área de reserva para a eólica mariña máis extensa do conxunto do Estado español. Neste caso, emprázase fronte as costas de Ortegal, Ferrolterra e A Coruña, localizándose a 48 km da Coruña, a 41 km da praia de Doniños en Ferrol e a menos de 30 km de Cariño e Cedeira. Precisamente, nesta área traballan embarcacións de toda a costa galega, desde Ribeira (O Barbanza) até Burela (A Mariña), así como buques procedentes de Asturias, Cantabria e Euskadi.
O espazo signifícase pola presenza de pescada, ollomol e palometa. Asemade é unha das área de referencia para a captura do bonito, sendo lugar de pesca habitual dun importante segmento de frota do palangre, da volanta e das artes menores. O Instituto Español de Oceanografía, organismo dependente do Consello Superior de Investigacións Científicas, adscrito ao Ministerio de Ciencia e Innovación, certifica a existencia de 67 caladoiros de alto valor nesta área.
Proxecto Nordés
As empresas madrileñas Bluefloat e Sener en sociedade con Plenitude, filial para o Estado da empresa pública italiana ENI, promoven neste espazo un parque eólico denominado Nordés, cunha potencia instalada de 1.200 megawatts. Segundo a información facilitada polas propias promotoras, estaría formada por 80 muíños de 118 metros de altura, ocuparía unha extensión de 268 km cadrados e emprazaríase a 30 km de Ferrol e a 60 da Coruña.
O proxecto Nordés foi rexeitado polo sector pesqueiro e os colectivos ecoloxistas. A este respecto, o colectivo Vento Mareiro denunciou que “o Nordés impactaría no Corredor Atlántico de migración de aves, un dos máis importantes do mundo, podendo afectar máis dun millón de aves”.