O Ministerio Público francés comunicou a cuarta feira, na última xornada na que a lexislación local permitía manter detido o fundador e director xeral de Telegram, o ruso Pavel Durov, antes de liberalo ou acusalo, que “un xuíz de instrución puxo fin á detención policial” e “levarao ante o tribunal para unha primeira comparecencia e unha posíbel acusación”.
Logo das críticas polo seu arresto, que levaron o mandatario francés, Emmanuel Macron, a asegurar que non se tratou dunha detención política, a axencia AFP publicou onte que Durov está a ser investigado por violencia grave contra un dos seus fillos en París en 2017, o que se suma ao proceso orixinal, que o inculpaba por presunta complicidade con crimes nos que se usou a plataforma de mensaxería e rede social.
Asemade, o xornal The Wall Street Journal detallou os contactos anteriores entre Macron e Durov, que conta tamén coa nacionalidade francesa, nos que o presidente lle propuxo trasladar a sede da empresa a París, o que Durov tería rexeitado. Tamén apunta que Francia participou no hackeo do seu móbil.
