O ex integrante de The Beatles demandou esta quarta-feira á xestora Sony/ATV nun tribunal federal de Nova York, co fin de recuperar os dereitos de autor das 267 cancións que compuxo co grupo entre os anos 1962 e 1971.
Segundo a demanda, McCartney comezou en outubro de 2008 a enviar avisos á empresa co desexo de recobrar os dereitos de varias das obras, como Let it Be, Love Me Do ou I Want to Hold Your Hand. Sony, até o momento, non recoñeceu o dereito do compositor a suspender as transferencias da propiedade intelectual das cancións. O proceso di que o artista podería comezar a recuperar os dereitos a partir do próximo mes de outubro.
Os avogados do músico insisten en que foron realizados varios pedidos a Sony, mais a empresa sempre se negou. Nun comunicado ao xornal especializado The Hollywood Reporter, a xestora respodeu á demanda dicindo que “Sony/ATV ten o maior respeito por Paul McCartney, con quen tivemos unha longa e mutuamente recompensadora relación co respeito polo estimado catálogo de música de Lennon & McCartney". “Estamos decepcionados por entrar no proceso, que consideramos innecesario e prematuro”, engade.
