Sally Yates, nomeada por Barack Obama, consideraba que existían serias dúbidas sobre a legalidade do decreto executivo ditado por Trump e, nese sentido, deu instrucións aos avogados do Departamento de Xustiza para que non aplicasen a orde.
Nunha misiva, Yates afirmara que non estaba "convencida" de que o decreto executivo de Trump fose plenamente legal. "Levando en conta que son a fiscal xeral en exercicio, o Departamento de Xustiza non apresentará argumentos en defensa da Orde Executiva", engadiu.
A resposta da equipa de Trump foi fulminante. Após o seu cesamento, un comunicado de imprensa da Casa Branca acusou Yates de "traizoar" o Departamento de Xustiza "ao se negar a pór en práctica unha orde legal que visa protexer os cidadáns dos EUA".
O ataque a Yates foi aínda máis alá ao apoñerlle debilidade face "a inmigración ilegal".
Yates foi reemprazada por Dana Boente, até agora fiscal do distrito oriental de Virxinia.
