O instrutor do 'procés', Pablo Llarena, remitiu aos xulgados de Barcelona os informes achegados polos Mossos d'Esquadra e o Ministerio de Interior español sobre a fuga de Carles Puigdemont o pasado 8 de agosto –antes da sesión de investidura de Salvador Illa como presidente da Generalitat– "para os efectos legais oportunos".
O maxistrado considera que existen indicios penais e avisa que o contido dos informes "impide excluír a participación doutros responsábeis non aparentes nos delitos previstos nos artigos 408 e 451.3.b do Código Penal" [que castigan a omisión do deber de perseguir delitos e o encubrimento cometido por parte de funcionarios] malia apuntar, iso si, "a posíbel participación de tres individuos na fuga".
Falta de detalle
Fontes xurídicas consultadas por Europa Press explican que o TS requiriu devanditos informes ao considerar que o alto tribunal merecía unha explicación oficial sobre o ocorrido aquel día.
Na providencia emitida esta quinta feira, o instrutor do 'procés' indica que "os informes achegan unha explicación detallada das circunstancias nas que se produciu a aparición pública do procesado rebelde e das razóns polas que non foi detectada a súa entrada/saída de España e non puido materializarse a súa detención", e precisa que o informe dos Mossos manifesta "a dificultade de abordar a detención do procesado no seo da aglomeración de persoas á que se incorporou".
Porén, Llarena considera que "os informes non reflicten impedimentos para que o dispositivo policial puidese abordar a detección do procesado rebelde no seu tránsito até o lugar onde se uniu a esa aglomeración de persoas que o esperaban, nin a imposibilidade de abordar con efectividade o seu posterior seguimento e alcance, até o punto de que se materializou a súa fuga do territorio nacional".
Así, o xuíz critica o funcionamento dos Mossos e critica que o informe policial catalán non detalle as supostas dificultades para deter Puigdemont antes de incorporarse ao evento do Arc de Triomf.
O informe dos Mossos
No documento remitido ao Tribunal Supremo, os Mossos fan autocrítica e admiten erros no dispositivo, como que os axentes non prevían a posibilidade de que Puigdemont volvese saír, e que puido escapar porque o dron que o estaba vixiando o acto de paseo de Lluís Companys seguiu a comitiva que acudía ao Parlament e non o coche branco ao que subiu o ex presidente.
